ആലപ്പുഴ: വെള്ളത്തില്‍ മുങ്ങിയതിനെത്തുടര്‍ന്ന് ഗുരുതരാവസ്ഥയില്‍ കായംകുളം താലൂക്ക് ആശുപത്രിയിലെത്തിച്ച ഒരു വയസ്സുള്ള കുഞ്ഞിനെ സമയോചിതമായ ഇടപെടലുകളിലൂടെ രക്ഷപെടുത്തിയ ആശുപത്രിയിലെ ഡോക്ടര്‍മാര്‍, നഴ്സിംഗ് സ്റ്റാഫ്, മറ്റ് ജീവനക്കാര്‍ എന്നിവരെ ജില്ല കളക്ടര്‍ വി.ആര്‍. കൃഷ്ണ തേജ അഭിനന്ദിച്ചു. ജില്ല മെഡിക്കല്‍ ഓഫീസില്‍ നടന്ന മെഡിക്കല്‍ ഓഫീസര്‍മാരുടെ മാസാവലോകന യോഗത്തിലാണ് കളക്ടര്‍ അഭിനന്ദനം അറിയിച്ചത്. ജീവനക്കാര്‍ക്ക് കളക്ടര്‍ പ്രശസ്തിപത്രവും നല്‍കി.
ജില്ല മെഡിക്കല്‍ ഓഫീസര്‍ (ആരോഗ്യം) ഡോ.ജമുന വര്‍ഗ്ഗീസ്, ഡെപ്യൂട്ടി ജില്ല മെഡിക്കല്‍ ഓഫീസര്‍മാര്‍, മറ്റ് പ്രോഗ്രാം ഓഫീസര്‍മാര്‍ തുടങ്ങിയവര്‍ പങ്കെടുത്തു.
