കണ്ണൂർ:എസ് എൻ കോളേജിൽ നാമനിർദേശ പത്രികകൾ കീറിയെറിഞ്ഞ ശേഷം റിട്ടേണിംഗ് ഓഫീസറെ പൂട്ടിയിടുകയും സംഘർഷാവസ്ഥ സൃഷ്ടിക്കുകയും ചെയ്ത സംഭവത്തിൽ എസ് എഫ് ഐ നേതാക്കൾക്കെതിരെ കേസെടുത്തു. എസ് എഫ് ഐ കണ്ണൂർ ജില്ലാ സെക്രട്ടറി വൈഷ്ണവ് മഹേന്ദ്രൻ, ആദർശ്, അർജുൻ എന്നിവർക്കെതിരെയാണ് കണ്ണൂർ ടൗൺ പോലീസ് കേസെടുത്തത്.
കോളേജ് യൂണിയൻ തിരഞ്ഞെടുപ്പിൽ ജനറൽ ക്യാപ്ടൻ സ്ഥാനത്തേക്കുള്ള എസ് എഫ് ഐ സ്ഥാനാർത്ഥിയുടെ നാമനിർദേശ പത്രിക തള്ളിയതിൽ പ്രകോപിതരായ പ്രവർത്തകർ അക്രമം അഴിച്ചു വിടുകയായിരുന്നു. സംഘർഷത്തിനിടെ എസ് എഫ് ഐ പ്രവർത്തകർ റിട്ടേണിംഗ് ഓഫീസറെ മുറിയിൽ പൂട്ടിയിട്ടിരുന്നു. ഇതോടെ പ്രിസിപ്പൽ പോലീസിനെ വിളിക്കുകയായിരുന്നു.
കണ്ണൂർ മാടായി കോളേജിലും യൂണിയൻ തിരഞ്ഞെടുപ്പുമായി ബന്ധപ്പെട്ട് സംഘർഷമുണ്ടായിരുന്നു. എസ് എഫ് ഐ പ്രവർത്തകരുടെ നാമനിർദ്ദേശ പത്രികകൾ തള്ളിയതോടെ, പ്രകോപിതരായ പ്രവർത്തകർ അദ്ധ്യാപകർക്കെതിരെ തിരിഞ്ഞു. പിന്നീട് ഇത് കെ എസ് യു പ്രവർത്തകരുമായുള്ള സംഘർഷമായി മാറുകയായിരുന്നു.
