ദില്ലി: കോവിഡ് 19 വായുവിലൂടെ പകരില്ലെന്നായിരുന്നു ഇതുവരെയുള്ള ധാരണ. എന്നാല്, വായുവിലൂടെയും പകരുന്നതിന് തെളിവുകളുണ്ടെന്ന് ശാസ്ത്രജ്ഞന്മാരുടെ സംഘം.
പുതിയ കണ്ടെത്തലിന്റെ അടിസ്ഥാനത്തില് മാനദണ്ഡങ്ങള് പരിഷ്കരിക്കാന് ലോകാരോഗ്യ സംഘടനയോട് ശാസ്ത്രജ്ഞരുടെ സംഘം ആവശ്യപ്പെട്ടു.
32 രാജ്യങ്ങളില് നിന്നുള്ള 239 ശാസ്ത്രജ്ഞരടങ്ങുന്ന സംഘമാണ് പുതിയ കണ്ടെത്തല് നടത്തിയിരിക്കുന്നത്. വായുവിലൂടെ വൈറസ് മനുഷ്യരില് നിന്ന് മനുഷ്യരിലേക്ക് പടരുമെന്നതിനുള്ള തെളിവുകള് ലോകാരോഗ്യ സംഘടനയെ കത്തിലൂടെ അറിയിച്ചിരിക്കുകയാണ്. തുമ്മുമ്പോഴും ചുമയ്ക്കുമ്പോഴും സംസാരിക്കുമ്പോഴും മൂക്കിലൂടെയും വായിലൂടെയും പുറത്തുവരുന്ന സ്രവത്തിലൂടെ രോഗം മറ്റുള്ളവര്ക്ക് പകരുമെന്നാണ് ലോകാരോഗ്യ സംഘടന നേരത്തെ വ്യക്തമാക്കിയിട്ടുള്ളത്.
അതേസമയം വൈറസ് വായുവിലൂടെ പകരുമെന്നതിനുള്ള തെളിവുകള് ബോധ്യപ്പെടുന്നില്ലെന്ന് ലോകാരോഗ്യ സംഘടന പറഞ്ഞതായും റിപ്പോര്ട്ടില് പറയുന്നു. എന്നാല് ഇത്തരമൊരു സാധ്യതയ്ക്ക് വ്യക്തമായ യാതൊരു തെളിവും ലഭിച്ചിട്ടില്ലെന്ന് ഡബ്ല്യുഎച്ച്ഒ അണുബാധ നിയന്ത്രണ തലവന് ഡോ. ബെനെഡെറ്റ അലെഗ്രാന്സി വ്യക്തമാക്കി.