തിരുവനന്തപുരം: റോഡ് കയ്യേറി പാർട്ടി സമ്മേളനങ്ങൾ നടത്തുന്നതിനെതിരെ കേരള ഹൈക്കോടതിയുടെ രൂക്ഷ വിമർശനം വന്നതിന് ശേഷവും നിയമ ലംഘനം തുടർന്ന് ഭരണാനുകൂല സംഘടനകൾ. സിപിഐ അനുകൂല സർവീസ് സംഘടനകൾ തിരുവനന്തപുരത്ത് നടത്തുന്ന രാപകൽ സമരം ഇപ്പോഴും തുടരുകയാണ്. സമരത്തെ അഭിസംബോധന ചെയ്യാൻ കെട്ടിയ സ്റ്റേജ് നടപ്പാതയും പ്രധാന റോഡും കയ്യേറിയ നിലയിലാണ്. ഇതുകാരണം കഴിഞ്ഞ 36 മണിക്കൂറായി നഗരത്തിൽ വലിയ ഗതാഗതകുരുക്ക് ഉണ്ടാക്കുകയാണ്. കഴിഞ്ഞ ദിവസത്തെ ഹൈക്കോടതി വിമർശനത്തിന്റെ പശ്ചാത്തലത്തിൽ സമരത്തിൽ പങ്കെടുത്ത കണ്ടാലറിയാവുന്ന 150 പേർക്കെതിരെ കന്റോൺമെന്റ് പോലീസ് കേസെടുത്തിട്ടുണ്ട്. പേരിന് കേസെടുത്തിട്ടുണ്ടെങ്കിലും റോഡ് കയ്യേറ്റം നീക്കാനോ നടപ്പാതകളിൽ നിന്ന് കസേരകൾ മാറ്റാനോ തയ്യാറായിട്ടില്ല.
സിപിഎം പാളയം ഏരിയ സമ്മേളനത്തിന്റെ സ്റ്റേജും ഇത്തരത്തിൽ റോഡ് കയ്യേറി നിർമ്മിച്ചിരുന്നു. ഇതാണ് ഹൈക്കോടതിയെ പ്രകോപിപ്പിച്ചത്. റോഡ് കയ്യേറി സ്റ്റേജ് നിർമ്മിച്ചതിൽ പാർട്ടി പിന്നീട് ഖേദം പ്രകടിപ്പിച്ചെങ്കിലും സ്റ്റേജ് നിർമ്മിച്ചത് പ്രധാന റോഡിലല്ലെന്ന് ന്യായീകരിച്ചിരുന്നു. റോഡിൽ സ്റ്റേജ് നിർമ്മിച്ചത് തെറ്റായിപ്പോയെന്ന് സിപിഎം ജില്ലാ സെക്രട്ടറി വി ജോയ് ഇന്നലെ പറഞ്ഞിരുന്നു. എന്നാൽ ഇപ്പോൾ ഭരണാനുകൂല സർവീസ് സംഘടനകളുടെ സമരം നടക്കുന്നത് പ്രധാന സംസ്ഥാന പാതയിലാണ്. വാഹനങ്ങൾ വഴിതിരിച്ചു വിട്ടതുമൂലം ഇന്നും ഇന്നലെയും നഗരങ്ങളിലെ ഇടറോഡുകളിലടക്കം വലിയ ഗതാഗതക്കുരുക്ക് രൂപപ്പെട്ടിരുന്നു. ഭരണാനുകൂല സംഘടനകളുടെ നിയമലംഘനത്തിന് നേരെ പോലീസ് കണ്ണടയ്ക്കുന്നുവെന്ന ആരോപണം ഉയർന്നു കഴിഞ്ഞു.
