കോട്ടയം: വൈദ്യുതി ബന്ധം പുനഃസ്ഥാപിക്കാനെത്തിയ കെ എസ് ഇ ബി ജീവനക്കാരെ കൈയേറ്റം ചെയ്യാൻ ശ്രമിച്ച് സി പി എം പ്രാദേശിക നേതാവ്. കോട്ടയം നാഗമ്പടത്താണ് സി പി എം ലോക്കൽ സെക്രട്ടറി സുരേഷ് കെ എസ് ഇ ബി ജീവനക്കാർക്കു നേരെ ഭീഷണി മുഴക്കിയത്.
വെളളം ഉയർന്നപ്പോൾ വൈദ്യുതിബന്ധം വിച്ഛേദിച്ചത് ചോദ്യം ചെയ്താണ് സുരേഷ് കെ എസ് ഇ ബി ജീവനക്കാർക്കുനേരെ തിരിഞ്ഞത്. കോട്ടയം സെക്ഷനിലെ അസിസ്റ്റന്‍റ് എൻജിനിയർ ഷാജി തോമസിന്റെ നേതൃത്വത്തിലുളള സംഘത്തെ സുരേഷ് അസഭ്യം പറയുകയും കൈയേറ്റം ചെയ്യാൻ ശ്രമിക്കുകയും ചെയ്തു.
“ഞാൻ ലോക്കൽ സെക്രട്ടറിയാടാ’, ഞാനാടാ ഇവിടുത്തെ കാര്യങ്ങളെല്ലാം നോക്കുന്നത് എന്നിങ്ങനെ സുരേഷ് കെ എസ് ഇ ബി ഉദ്യോഗസ്ഥർക്കു നേരെ ആക്രോശിച്ചു. ഇതിന്‍റെ വീഡിയോ ദൃശ്യങ്ങൾ പുറത്തുവന്നിട്ടുണ്ട്. സംഭവത്തിൽ കെ എസ് ഇ ബി അസിസ്റ്റന്‍റ് എൻജിനീയർ ഷാജി തോമസ് പോലീസിൽ പരാതി നൽകി.
