കൊച്ചി: കരുവന്നൂര് സഹകരണ ബാങ്ക് തട്ടിപ്പ് കേസില് സിപിഐഎം സംസ്ഥാന സമിതി അംഗം എംകെ കണ്ണന് വീണ്ടും ഇഡി നോട്ടീസ്. വ്യാഴാഴ്ച ഹാജരാകാനാണ് ഇഡി നിര്ദേശം. അതേസമയം, എസി മൊയ്തീനെ വീണ്ടും വിളിപ്പിക്കാനാണ് ഇ ഡി നീക്കം. ഉടന് ഹാജരാകണമെന്നാവശ്യപ്പെട്ട് നോട്ടീസ് നല്കും.
കഴിഞ്ഞ മാസം 29ന് എംകെ കണ്ണന് ഇഡിയുടെ മുന്നില് ചോദ്യം ചെയ്യലിന് ഹാജരായിരുന്നു. ചോദ്യം ചെയ്യലുമായി കണ്ണന് സഹകരിക്കുന്നില്ലെന്നും മൊഴികളില് പൊരുത്തക്കേടുകളുണ്ടെന്നും ഇ ഡി പറഞ്ഞിരുന്നു. എന്നാല് ഇഡിയുടെ വെളിപ്പെടുത്തലുകള് എംകെ കണ്ണന് നിഷേധിച്ചു. ചോദ്യം ചെയ്യല് സൗഹാര്ദ്ദപരമായിരുന്നു എന്നും ഇഡി എപ്പോള് വിളിപ്പിച്ചാലും വരുമെന്നും കണ്ണന് വിശദമാക്കിയിരുന്നു.
അതേസമയം സഹകരണ ബാങ്കുകളിലെ സിപിഎം കൊള്ളയ്ക്കും കള്ളപ്പണത്തട്ടിപ്പിനുമെതിരെ മുൻ എംപി സുരേഷ് ഗോപിയുടെ നേതൃത്വത്തിൽ ബിജെപി സംഘടിപ്പിക്കുന്ന സഹകാരി സംരക്ഷണ പദയാത്ര ഇന്ന്. ഉച്ചയ്ക്ക് ഒന്നരയ്ക്ക് കരുവന്നൂര് സഹകരണ ബാങ്കിന് മുന്നില് നിന്ന് സംസ്ഥാന അദ്ധ്യക്ഷന് കെ. സുരേന്ദ്രന് പദയാത്ര ഉദ്ഘാടനം ചെയ്യും.