തിരുവനന്തപുരം: പിഎസ്സി പരീക്ഷയിലെ ക്രമക്കേട് ക്രൈംബ്രാഞ്ച് അന്വേഷിക്കും . ക്രൈംബ്രാഞ്ച് തിരുവനന്തപുരം യൂണിറ്റിനാണ് അന്വേഷണ ചുമതല. അന്വേഷണം ആവശ്യപ്പെട്ട് നേരത്തെ പിഎസ്സി ഡിജിപിക്ക് കത്ത് നൽകിയിരുന്നു.
വിവിധ ബറ്റാലിയനുകളിലായുള്ള സിവിൽ പോലീസ് ഓഫീസർമാരുടെ എട്ടു റാങ്ക് ലിസ്റ്റുകളിലെ ആദ്യ 100 റാങ്കിൽ ഉൾപ്പെട്ടവരുടെ മൊബൈൽ ഫോണ് വിവരങ്ങൾ പരിശോധിക്കാൻ സംസ്ഥാന പോലീസ് മേധാവിയോട് പിഎസ്സി നേരത്തെ ആവശ്യപ്പെട്ടിരുന്നു.
യൂണിവേഴ്സിറ്റി കോളജിലെ കുത്തു കേസിൽ ഉൾപെട്ട മൂന്ന് പേർ മൊബൈൽ ഫോണ് ഉപയോഗിച്ച് പരീക്ഷ എഴുതിയതായി വിജിലൻസ് അന്വേഷണത്തിൽ കണ്ടെത്തിയിരുന്നു. ഈ സാഹചര്യത്തിലാണ് മറ്റുള്ളവരുടെ വിവരങ്ങളും പരിശോധിക്കാൻ പോലീസിനോട് ആവശ്യപ്പെട്ടത്. പിഎസ്സി ചട്ടപ്രകാരം സംസ്ഥാന പോലീസിന്റെ അന്വേഷണ ഏജൻസിക്ക് മാത്രമേ കേസ് കൈമാറാനാകൂ.