സൈക്ലിങ് പരിശീലനത്തിനിടെ സൈക്കിൾ ലോറിയിലേക്ക് ഇടിച്ചുകയറിയുണ്ടായ അപകടത്തിൽ പൊലീസുകാരൻ മരിച്ചു . തിരുവനന്തപുരം കല്ലറ മരുതമണ്‍ സ്വദേശി ഹിരണ്‍രാജ് (47) ആണ് അപകടത്തിൽ മരിച്ചത്. തിരുവന്തപുരം വികാസ് ഭവനില്‍ റൂറല്‍ എസ്.പി ഓഫീസിലെ ഉദ്യോഗസ്ഥനായിരുന്നു. കേരളത്തിലെ അറിയപ്പെടുന്ന സൈക്ലിംഗ് താരങ്ങളിൽ ഒരാളായിരുന്നു ഹിരണ്‍രാജ്.
കഴിഞ്ഞ ബുധനാഴ്ച കോവളം ഭാഗത്ത് വച്ചായിരുന്നു അപകടം നടന്നത്. ഉടന്‍തന്നെ തിരുവന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ഇന്ന് പുലര്‍ച്ചെ മരണം സംഭവിക്കുകയായിരുന്നു.
തിരുവനന്തപുരം മെഡിക്കല്‍ കോളേജില്‍ പോസ്റ്റുമോർട്ടം നടപടികൾക്ക് ശേഷം മൃതദേഹം വൈകുന്നേരം 5 മണിയോടെ ഔദ്യോഗിക ബഹുമതികളോടെ കല്ലറയിലെ കുടുംബവീട്ടുവളപ്പില്‍ സംസ്‌കരിച്ചു.
