ദില്ലി : പതിനെട്ട് വർഷത്തെ നീണ്ട കാത്തിരിപ്പിനും ചർച്ചകൾക്കും വിരാമമിട്ടുകൊണ്ട് ഇന്ത്യയും യൂറോപ്യൻ യൂണിയനും തമ്മിലുള്ള സ്വതന്ത്ര വ്യാപാര കരാർ ഒപ്പുവെച്ചു. യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ ‘വ്യാപാര കരാറുകളുടെ മാതാവ്’ എന്ന് വിശേഷിപ്പിച്ച ഈ ചരിത്രപരമായ നീക്കം ഇന്ത്യൻ വിപണിയിലും ഉപഭോക്താക്കൾക്കിടയിലും വലിയ ആവേശമാണ് സൃഷ്ടിച്ചിരിക്കുന്നത്. യൂറോപ്പിൽ നിന്നുള്ള ഇറക്കുമതി ഉൽപ്പന്നങ്ങളുടെ തീരുവ ഗണ്യമായി കുറയുന്നതോടെ ആഡംബര കാറുകൾ, പ്രീമിയം മദ്യം, അത്യാധുനിക മരുന്നുകൾ തുടങ്ങിയവയുടെ വില കുറയുകയും ഇന്ത്യൻ കയറ്റുമതി മേഖലയ്ക്ക് വൻ സാധ്യതകൾ തുറക്കപ്പെടുകയും ചെയ്യും.
വാഹനപ്രേമികളെ സംബന്ധിച്ചിടത്തോളം ഏറ്റവും വലിയ ആശ്വാസം മെഴ്സിഡസ് ബെൻസ്, ബിഎംഡബ്ല്യു, ഔഡി തുടങ്ങിയ യൂറോപ്യൻ ആഡംബര കാറുകളുടെ വിലയിലുണ്ടാകുന്ന വൻ ഇടിവാണ്. നിലവിൽ നൂറ് ശതമാനത്തിന് മുകളിലുള്ള ഇറക്കുമതി തീരുവ പുതിയ കരാറിലൂടെ 40 ശതമാനമായി കുറയും. വരും വർഷങ്ങളിൽ ഇത് പത്ത് ശതമാനത്തിലേക്ക് വരെ താഴാൻ സാധ്യതയുള്ളതിനാൽ ലക്ഷക്കണക്കിന് രൂപയുടെ കുറവാണ് ആഡംബര വാഹനങ്ങൾക്ക് പ്രതീക്ഷിക്കുന്നത്. എന്നാൽ ഇന്ത്യൻ ഓട്ടോമൊബൈൽ വിപണിയെ സംരക്ഷിക്കുന്നതിനായി 16 ലക്ഷം രൂപയിൽ താഴെ വിലയുള്ള ചെറുകാറുകളുടെ ഇറക്കുമതിയിൽ യൂറോപ്യൻ യൂണിയൻ നിയന്ത്രണം പാലിക്കും. കുറഞ്ഞ വിലയിലുള്ള കാറുകൾ യൂറോപ്പിൽ നിന്ന് ഇറക്കുമതി ചെയ്യുന്നതിന് പകരം ഇന്ത്യയിൽ തന്നെ നിർമ്മിക്കാനാണ് ധാരണയായിരിക്കുന്നത്.
മദ്യവിപണിയിലും ഈ കരാർ വിപ്ലവകരമായ മാറ്റങ്ങൾ കൊണ്ടുവരും. ഫ്രാൻസ്, ഇറ്റലി, സ്പെയിൻ എന്നിവിടങ്ങളിൽ നിന്നുള്ള വൈനുകൾക്കും സ്പിരിറ്റുകൾക്കും ഇന്ത്യ ഇപ്പോൾ ചുമത്തുന്ന 150 ശതമാനം ഇറക്കുമതി തീരുവ പടിപടിയായി 20 ശതമാനത്തിലേക്ക് കുറയ്ക്കും. അടുത്ത അഞ്ച് മുതൽ പത്ത് വർഷത്തിനുള്ളിൽ ഈ മാറ്റം പൂർണ്ണമായി നടപ്പിലാകുന്നതോടെ വിദേശ വൈനുകൾ, പ്രീമിയം ജിൻ, വോഡ്ക, കോഗ്നാക് എന്നിവയുടെ വില ഗണ്യമായി കുറയും. ആഭ്യന്തര വൈൻ വിപണിയെ ബാധിക്കാതിരിക്കാൻ നിശ്ചിത തുകയിൽ താഴെ വിലയുള്ള വൈനുകൾക്ക് ഈ ഇളവ് ബാധകമാകില്ല. അതേസമയം ഇന്ത്യൻ വൈനുകൾക്ക് യൂറോപ്യൻ വിപണിയിൽ കൂടുതൽ സ്വീകാര്യത ലഭിക്കാനും ഈ കരാർ വഴിയൊരുക്കും.
ആരോഗ്യ മേഖലയിലും കരാർ നിർണ്ണായകമായ പുരോഗതിയാണ് വാഗ്ദാനം ചെയ്യുന്നത്. അർബുദം ഉൾപ്പെടെയുള്ള മാരകരോഗങ്ങൾക്കുള്ള വിദേശ മരുന്നുകൾക്കും അത്യാധുനിക മെഡിക്കൽ ഉപകരണങ്ങൾക്കും വില കുറയുന്നത് സാധാരണക്കാർക്ക് വലിയ ആശ്വാസമാകും. കൂടാതെ ഇന്ത്യയിൽ നിർമ്മിക്കുന്ന മരുന്നുകൾക്ക് യൂറോപ്പിലെ 27 രാജ്യങ്ങളിൽ തടസ്സങ്ങളില്ലാതെ വിപണി കണ്ടെത്താനും ഇതിലൂടെ സാധിക്കും. സാങ്കേതിക മേഖലയിൽ വിമാനങ്ങളുടെ സ്പെയർ പാർട്സുകൾ, മൊബൈൽ ഫോണുകൾ, ഹൈടെക് ഇലക്ട്രോണിക് ഉൽപ്പന്നങ്ങൾ എന്നിവയുടെ തീരുവ ഒഴിവാക്കുന്നത് ഗാഡ്ജെറ്റുകളുടെ നിർമ്മാണച്ചെലവ് കുറയ്ക്കുകയും ഉപഭോക്താക്കൾക്ക് കുറഞ്ഞ വിലയിൽ ഇവ ലഭ്യമാക്കാൻ സഹായിക്കുകയും ചെയ്യും.
ഇന്ത്യൻ കയറ്റുമതി മേഖലയ്ക്കും കരാർ വലിയ കരുത്ത് പകരും. വസ്ത്രങ്ങൾ, തുകൽ ഉൽപ്പന്നങ്ങൾ, ആഭരണങ്ങൾ എന്നിവയ്ക്ക് യൂറോപ്യൻ വിപണിയിൽ വലിയ സാധ്യതകളാണ് തുറന്നിരിക്കുന്നത്. കൂടാതെ ഇരുമ്പ്, ഉരുക്ക്, രാസവസ്തുക്കൾ എന്നിവയുടെ ഇറക്കുമതി തീരുവ ഇല്ലാതാകുന്നത് നിർമ്മാണ മേഖലയിലെ അസംസ്കൃത വസ്തുക്കളുടെ വില കുറയാൻ കാരണമാകും. ഇത് രാജ്യത്തെ വ്യവസായ വളർച്ചയ്ക്കും വീട് നിർമ്മാണം പോലുള്ള മേഖലകളിൽ ചെലവ് കുറയുന്നതിനും ഇടയാക്കും. ചുരുക്കത്തിൽ ഇരു രാജ്യങ്ങളും തമ്മിലുള്ള സാമ്പത്തിക ബന്ധം കൂടുതൽ ദൃഢമാക്കുന്നതിനൊപ്പം സാധാരണക്കാരായ ഉപഭോക്താക്കൾക്കും ഈ കരാർ വലിയ നേട്ടങ്ങൾ സമ്മാനിക്കും.
