കടയ്ക്കാവൂരിൽ വയോധിക തീപ്പൊള്ളലേറ്റ് മരിച്ച സംഭവം കൊലപാതകമെന്ന് വ്യക്തമാക്കി പോലീസ്. മകൻ വിഷ്ണുവാണ് വയോധികയെ കൊലപ്പെടുത്തിയതെന്നും ഇയാൾ കുറ്റം സമ്മതിച്ചുവെന്നും പോലീസ് അറിയിച്ചു. വയോധികയെ തലയ്ക്കടിച്ച് വീഴ്ത്തിയ ശേഷമാണ് വിഷ്ണു മണ്ണെണ്ണ ഒഴിച്ച് തീ ഇട്ടത്. ഇയാൾ ലഹരിക്കടിമായണെന്നും പോലീസ് വ്യക്തമാക്കി. ഫോറൻസിക് സംഘവും വിരൽ അടയാള വിദഗ്ധരും സ്ഥലത്ത് പരിശോധന നടത്തി. മൃതദേഹം പോസ്റ്റുമോർട്ടത്തിനായി മെഡിക്കൽ കോളേജിലേക്ക് മാറ്റിയിരിക്കുകയാണ്.
ഇന്ന് പുലർച്ചെയാണ് 62 കാരിയായ ജനനിയെ തീപൊള്ളലേറ്റ് മരിച്ച നിലയിൽ കാണപ്പെട്ടത്. വിവരമറിഞ്ഞ പോലീസ് സംഘം പുലർച്ചെ രണ്ട് മണിയോടെ സംഭവസ്ഥലത്ത് എത്തി. വീട്ടിൽ നിന്ന് തീ പടരുന്നത് ശ്രദ്ധയിൽപ്പെട്ട നാട്ടുകാരാണ് പോലീസിൽ വിവരം അറിയിച്ചത്. പോലീസ് എത്തിയപ്പോൾ വിഷ്ണുവിനെയും പൊള്ളലേറ്റ നിലയിൽ കണ്ടെത്തിയിരുന്നു. തുടർന്ന് പോലീസ് നടത്തിയ അന്വേഷണത്തിലാണ് മകൻ തന്നെയാണ് തീ കൊളുത്തിയതെന്ന നിഗമനത്തിൽ പൊലീസ് എത്തിയത്. പിന്നാലെ സംഭവ സ്ഥലത്ത് നിന്ന് രണ്ട് കിലോമീറ്റർ അകലെ നിന്ന് വിഷ്ണുവിനെ കസ്റ്റഡിയിലെടുക്കുകയായിരുന്നു.
