ദില്ലി : ആരാധനാലയങ്ങളുടെ ഭൂമി സംരക്ഷണവുമായി ബന്ധപ്പെട്ട പൊതുതാൽപര്യ ഹർജി സുപ്രിംകോടതിയിൽ. വിവിധ ക്ഷേത്രങ്ങൾക്ക് സംഭാവനയായി ലഭിക്കുന്ന ഭൂമി കൈയ്യേറുന്നുവെന്നും ഇത് തടയാൻ സംസ്ഥാന സർക്കാരുകൾക്ക് നിർദ്ദേശം നൽകണമെന്നും ഇതിൽ കോടതിയുടെ ഇടപെടൽ ആവശ്യപ്പെട്ടുമാണ് പൊതുതാൽപര്യ ഹർജി നൽകിയത്. പല സംസ്ഥാനങ്ങളിലും ഭൂമാഫിയയാണ് ക്ഷേത്രങ്ങളുടെ ഭൂമി കൈയ്യേറ്റം ചെയ്യുന്നതെന്നാണ് ഹർജിയിലെ ആരോപണം. മലയാളിയായ വാമന പ്രഭു എന്നയാളാണ് സുപ്രീംകോടതിയിൽ ഹർജി നൽകിയത്.
ആരാധനാലയങ്ങളുടെയും വഖഫ് ബോർഡുകളുടേയും അടക്കം ഭൂമികളിലെ കൈയ്യേറ്റം നടത്തുന്നത് തടയുന്നതിന് നടപടി വേണമെന്നും ഹർജിക്കാരൻ ആവശ്യപ്പെട്ടു. ഇതുമായി ബന്ധപ്പെട്ട് കൃത്യമായ നടപടികൾക്ക് അതത് സംസ്ഥാന സർക്കാരിനോട് നിർദ്ദേശിക്കണമെന്നും ഹർജിയിൽ പറയുന്നുണ്ട്.
