ബീഹാര്‍: ബിഹാറിൽ മുസാഫിര്‍പൂരിലെ ഒരു ഹോട്ടലില്‍ നിന്ന് വോട്ടിംഗ് യന്ത്രങ്ങള്‍ പിടിച്ചെടുത്തു. ചൊവ്വാഴ്ച രാത്രിയാണ് സംഭവം. അഞ്ച് യന്ത്രങ്ങളാണ് ഹോട്ടലിൽ നിന്നും പിടിച്ചെടുത്തിരിക്കുന്നതെന്ന് എഎൻഐ റിപ്പോര്‍ട്ട് ചെയ്തു. രണ്ട് ബാലറ്റ് യൂണിറ്റ്, ഒരു കണ്‍ട്രോള്‍ യൂണിറ്റ്, രണ്ട് വിവിപാറ്റ് യന്ത്രങ്ങള്‍ എന്നിവയാണ് പിടിച്ചെടുത്തിരിക്കുന്നത്.
രണ്ട് ഘട്ടങ്ങളിലായി 16 മണ്ഡലങ്ങള്‍ ബീഹാറിൽ തിരഞ്ഞെടുപ്പിന് ബാക്കി നില്‍ക്കെയാണ് വോട്ടിംഗ് യന്ത്രങ്ങള്‍ പിടിച്ചെടുത്തിരിക്കുന്നതെന്നത് ഏറെ ശ്രദ്ധേയമാണ്. സെക്ടർ ഉദ്യോഗസ്ഥനായ അവദേഷ് കുമാറിന്‍റെ പക്കൽ നിന്നുമാണ് യന്ത്രങ്ങൾ പിടിച്ചെടുത്തിരിക്കുന്നത്.
ഏതെങ്കിലും ബൂത്തുകളിൽ കേടാകുന്ന യന്ത്രങ്ങൾക്ക് പകരം എത്തിക്കാൻ നൽകിയിരുന്ന യന്ത്രങ്ങളാണ് ഇപ്പോള്‍ പിടിച്ചെടുത്തിരിക്കുന്നതെന്നാണ് തിരഞ്ഞെടുപ്പ് കമ്മീഷൻ വിശദീകരിച്ചിരിക്കുന്നത്. യന്ത്രങ്ങൾ ഹോട്ടലിൽ സൂക്ഷിച്ച ഉദ്യോഗസ്ഥനെതിരെ വകുപ്പ് തല നടപടി എടുക്കുമെന്ന് ജില്ല കളക്ടർ വ്യക്തമാക്കിയിരിക്കുകയാണ്.
