മീററ്റ്: ഉത്തര്‍പ്രദേശിലെ ജിആര്‍പി റെയില്‍വേ സ്റ്റേഷനില്‍ ബോംബ് സ്ഥാപിച്ചതായി വ്യാജ സന്ദേശം നല്‍കിയ ആളെ പോലീസ് അറസ്റ്റ് ചെയ്തു. നബിപ്പൂര്‍ഗ്രാമത്തിലെ ശിവം പോസ്വാള്‍ എന്നയാളെയാണ് പോലീസ് അറസ്റ്റ് ചെയ്തത്. ഞായറാഴ്ച ഉച്ചയ്ക്ക് ഒന്നരയോടെയായിരുന്നു സംഭവം.
മീററ്റ് പോലീസ് കണ്‍ട്രോള്‍ റൂമിലേക്ക് ജിആര്‍പി റെയില്‍വേ സ്റ്റേഷനില്‍ ബോംബ് വച്ചതായി സന്ദേശം നല്‍കുകയായിരുന്നു. വിവരം ലഭിച്ചതോടെ റെയില്‍വേ സ്റ്റേഷനിലും പരിസരത്തും പോലീസ് സംഘം വിശദമായി പരിശോധന നടത്തി. എന്നാല്‍ സംശയാസ്പദമായ യാതൊന്നും കണ്ടെത്താന്‍ സാധിച്ചില്ല. തുടര്‍ന്നു പോലീസ് നടത്തിയ അന്വേഷണത്തിലാണ് ശിവം പോസ്‌വാളിനെ പിടികൂടിയത്. തുടര്‍ന്ന് ഫോണ്‍ കോണ്‍ തട്ടിപ്പാണെന്ന് തിരിച്ചറിഞ്ഞതോടെ പോലീസ് പ്രതിയെ പിടികൂടുകയായിരുന്നു. ഇയാള്‍ക്കെതിരെ നടപടികള്‍ ആരംഭിച്ചതായും പോലീസ് കൂട്ടിച്ചേര്‍ത്തു.
