കൊറോണ വൈറസ് ബാധയുടെ പശ്ചാത്തലത്തില് സാമൂഹ്യ മാധ്യമങ്ങളിലൂടെ വ്യാജ വാര്ത്ത പ്രചരിപ്പിച്ചതിന് സംസ്ഥാനത്ത് മൂന്ന് കേസുകള് രജിസ്റ്റര് ചെയ്തു. എറണാകുളം സെന്ട്രല് പോലീസ് സ്റ്റേഷനില് രണ്ടും തൃശൂര് കുന്നംകുളം പോലീസ് സ്റ്റേഷനില് ഒരു കേസുമാണ് രജിസ്റ്റര് ചെയ്തിരിക്കുന്നത്. ഇതുവരെ ആരെയും അറസ്റ്റ് ചെയ്തിട്ടില്ല.
എറണാകുളം പോലീസ് അസിസ്റ്റന്റ് കമ്മീഷണര് കെ. ലാല്ജിയുടെ പേരില് വ്യാജ സന്ദേശം പ്രചരിപ്പിച്ചതിനാണ് ഒരു കേസ്. കൊറോണ വൈറസ് അസുഖമില്ലെന്നും സര്ക്കാര് ബോധപൂര്വം പ്രശ്നങ്ങള് സൃഷ്ടിക്കുകയാണെന്നും ആരോപിച്ച് സാമൂഹ്യമാധ്യമങ്ങളില് വീഡിയോ പ്രചരിപ്പിച്ചതിനാണ് ജേക്കബ് വടക്കുഞ്ചേരിക്കെതിരെ കേസെടുത്തത്.
കുന്നംകുളം താലൂക്ക് ആശുപത്രിയില് കൊറോണ ബാധിച്ചയാളെ പ്രവേശിപ്പിച്ചിട്ടുണ്ടെന്ന് വ്യാജ സന്ദേശം പ്രചരിപ്പിച്ചതിന് എരുമപ്പെട്ടി സ്വദേശി പ്രവീഷ് ലാലിനെതിരെയാണ് മൂന്നാമത്തെ കേസ്. കുന്നംകുളം താലൂക്ക് ആശുപത്രി സൂപ്രണ്ടിന്റെ പരാതിയുടെ അടിസ്ഥാനത്തിലാണ് നടപടി.