ഹൈദരാബാദ്: തെലുങ്ക് സിനിമാ മേഖലയിലെ പ്രശസ്ത ഫാഷൻ ഡിസൈനർ പ്രത്യുഷ ഗരിമെല്ലയെ മരിച്ച നിലയിൽ കണ്ടെത്തി. ഹൈദരാബാദിലെ ബഞ്ചാര ഹിൽസിലെ സ്വന്തം അപ്പാർട്ട്‌മെന്റിലെ കുളിമുറിയിലാണ് പ്രത്യുഷയെ മരിച്ച നിലയിൽ കണ്ടെത്തിയത്. കൂടുതൽ പരിശോധനയിൽ ഇവരുടെ മുറിയിൽ നിന്ന് കാർബൺ മോണോക്‌സൈഡിന്റെ കുപ്പി കണ്ടെത്തിയതായി പോലീസ് പറഞ്ഞു.
വിഷവാതകം ശ്വസിച്ചാകാം പ്രത്യുഷ മരിച്ചതെന്നാണ് പോലീസ് പറയുന്നത്. സംഭവത്തിൽ ദുരൂഹ മരണത്തിന് പോലീസ് കേസെടുത്തു. കുടുംബാംഗങ്ങളെയും സുഹൃത്തുക്കളെയും വിവരം അറിയിച്ചു.
പ്രത്യുഷ ഒരു വിഷാദരോഗിയായിരുന്നെന്ന് സൂചനയുണ്ട്.
ശനിയാഴ്ച രാവിലെയാണ് പ്രത്യുഷ ബൊട്ടീക്കിൽ എത്തിയതെന്നും ഉച്ചയായിട്ടും പുറത്തിറങ്ങാത്തതിനെ തുടർന്ന് താൻ പോയി പരിശോധിച്ചെന്നും വാച്ച്മാൻ പോലീസിനോട് പറഞ്ഞു. വാതിലിൽ ആവർത്തിച്ച് മുട്ടിയിട്ടും ഒരു പ്രതികരണവും ലഭിച്ചില്ല. തുടർന്ന് അയൽവാസികളെ വിവരമറിയിച്ചു, അവർ പോലീസിൽ വിവരമറിയിച്ചുവെന്നുമാണ് വിവരം.
അമേരിക്കയിൽ ഫാഷൻ ഡിസൈനിംഗ് പഠിച്ച പ്രത്യുഷ ഹൈദരാബാദിലാണ് കരിയർ ആരംഭിച്ചത്. 2013ൽ സ്വന്തം പേരിൽ ബ്രാൻഡ് തുടങ്ങി. പിന്നീട് പെട്ടെന്നായിരുന്നു വളർച്ച. ടോളിവുഡിലെയും ബോളിവുഡിലെയും പ്രശസ്തരായ നിരവധി താരങ്ങൾക്കൊപ്പം പ്രവർത്തിച്ചിട്ടുണ്ട്. മൃതദേഹം പോസ്റ്റ്‌മോർട്ടത്തിനായി ഉസ്മാനിയ ആശുപത്രിയിലേക്ക് മാറ്റി.
