ഗുജറാത്തിലെ ദാഹോദിൽ നടന്ന വിവാഹ ചടങ്ങിനിടെയുണ്ടായ ഭക്ഷ്യവിഷബാധയെത്തുടർന്ന് നാനൂറിലധികം പേരെ ആശുപത്രിയിൽ പ്രവേശിപ്പിച്ചു. ഞായറാഴ്ച രാത്രി നടന്ന വിവാഹ വിരുന്നിന് പിന്നാലെയാണ് അതിഥികൾക്ക് ശാരീരിക അസ്വസ്ഥതകൾ അനുഭവപ്പെട്ടത്. ഭക്ഷണം കഴിച്ചയുടൻ ശക്തമായ വയറുവേദനയും, ഛർദ്ദിയും, തലകറക്കവും അനുഭവപ്പെട്ടതോടെ പരിഭ്രാന്തരായ അതിഥികൾ സമീപത്തെ സ്വകാര്യ ക്ലിനിക്കുകളിലേക്കും സർക്കാർ ആരോഗ്യ കേന്ദ്രങ്ങളിലേക്കും ഇരച്ചെത്തുകയായിരുന്നു.
പ്രാഥമിക ചികിത്സയ്ക്ക് ശേഷം മിക്കവരെയും ഡിസ്ചാർജ് ചെയ്തെങ്കിലും, കുട്ടികളടക്കം നാൽപ്പതോളം പേർ ഇപ്പോഴും ചികിത്സയിലും നിരീക്ഷണത്തിലുമാണ്. വിവാഹ സദ്യയിൽ വിളമ്പിയ പാൽ ചേർത്ത മധുരപലഹാരങ്ങളോ, ഭക്ഷണം പാകം ചെയ്യാൻ ഉപയോഗിച്ച വെള്ളത്തിലുണ്ടായ മലിനീകരണമോ ആകാം ഭക്ഷ്യവിഷബാധയ്ക്ക് കാരണമെന്നാണ് പ്രാഥമിക നിഗമനം.
കഴിഞ്ഞ ഒരാഴ്ചയായി ഗുജറാത്തിന്റെ വിവിധ ഭാഗങ്ങളിൽ സമാനമായ നിരവധി സംഭവങ്ങൾ റിപ്പോർട്ട് ചെയ്യപ്പെടുന്നത് വലിയ ആശങ്കയാണ് സൃഷ്ടിക്കുന്നത്. മെഹ്സാനയിൽ നോമ്പുതുറ ഭക്ഷണത്തിൽ നിന്ന് അറുപത് പേർക്കും, സൂറത്തിൽ ഹോസ്റ്റലിൽ നിന്ന് ഇരുപത്തിയഞ്ച് വിദ്യാർത്ഥികൾക്കും, അഹമ്മദാബാദിൽ പ്രശസ്തമായ സ്ഥാപനത്തിൽ നിന്ന് മധുരപലഹാരം കഴിച്ച നിരവധി കുടുംബങ്ങൾക്കും ഭക്ഷ്യവിഷബാധയേറ്റിരുന്നു. വേനൽക്കാലത്ത് അന്തരീക്ഷ ഊഷ്മാവ് വർദ്ധിക്കുന്നതോടെ പനീർ, മാവ, ക്രീം തുടങ്ങിയ പെട്ടെന്ന് കേടായിപ്പോകുന്ന ഭക്ഷണസാധനങ്ങളുടെ സുരക്ഷ ഉറപ്പാക്കുന്നതിലെ വീഴ്ചയാണ് ഇത്തരം സംഭവങ്ങൾക്ക് കാരണമാകുന്നതെന്ന് ആരോഗ്യ വകുപ്പ് വിലയിരുത്തുന്നു.
തുടർച്ചയായ ഭക്ഷ്യവിഷബാധ റിപ്പോർട്ടുകളെത്തുടർന്ന് സംസ്ഥാന സർക്കാർ ഭക്ഷ്യസുരക്ഷാ വിഭാഗത്തിന് കർശന നിർദേശം നൽകി. കേറ്ററിംഗ് സ്ഥാപനങ്ങളിലും മധുരപലഹാര കടകളിലും ഉൾപ്പെടെ സംസ്ഥാന വ്യാപകമായി അടിയന്തര പരിശോധനകൾ ആരംഭിച്ചു. വരും ദിവസങ്ങളിലും പരിശോധനകൾ തുടരുമെന്നും, ഭക്ഷ്യസുരക്ഷാ മാനദണ്ഡങ്ങൾ ലംഘിക്കുന്ന സ്ഥാപനങ്ങൾക്കെതിരെ നിയമപരമായ നടപടികൾ സ്വീകരിക്കുമെന്നും അധികൃതർ വ്യക്തമാക്കി.
വലിയ സാമൂഹിക ചടങ്ങുകളിൽ പങ്കെടുക്കുമ്പോൾ പൊതുജനങ്ങൾ ജാഗ്രത പാലിക്കണമെന്ന് ആരോഗ്യ വിദഗ്ധർ നിർദ്ദേശിക്കുന്നു. പച്ചക്കറി സാലഡുകൾ പരമാവധി ഒഴിവാക്കണമെന്നും, ശുദ്ധീകരിച്ചതോ സീൽ ചെയ്തതോ ആയ കുടിവെള്ളം മാത്രം ഉപയോഗിക്കണമെന്നും, പുതുമയില്ലാത്തതും ഗുണനിലവാരമില്ലാത്തതുമായ ക്ഷീരോൽപ്പന്നങ്ങൾ കഴിക്കുന്നത് ഒഴിവാക്കണമെന്നുമാണ് ആരോഗ്യ വകുപ്പിന്റെ മുന്നറിയിപ്പ്.
