കോഴിക്കോട്: നാലു ലക്ഷത്തോളം രൂപ വിലവരുന്ന പുകയില ഉല്‍പന്നങ്ങൾ വീട്ടിൽ സൂക്ഷിച്ച യുവാവ് അറസ്റ്റില്‍. പുതിയറ സ്വദേശി തച്ചറക്കല്‍ മുജീബിനെയാണ് മെഡിക്കല്‍ കോളജ് പോലീസ് ശനിയാഴ്ച അറസ്റ്റ് ചെയ്തത്.
അസി. കമീഷണര്‍ കെ. സുദര്‍ശന് ലഭിച്ച ഒരു രഹസ്യ വിവരത്തെ തുടര്‍ന്ന് മുജീബിന്‍റെ പുതിയറയിലെ വീട്ടില്‍ പരിശോധന നടത്തിയപ്പോഴാണ് വീട്ടിൽ സൂക്ഷിച്ചിരുന്ന 10 ചാക്ക് ഹാന്‍സ് കണ്ടെത്തിയത്.
ബംഗളൂരുവില്‍ നിന്ന് ടൂറിസ്റ്റ് ബസുകളില്‍ പാര്‍സല്‍ എന്ന വ്യാജേനയാണ് ഇവ കടത്തിക്കൊണ്ടുവന്നത്. പുകയില ഉല്‍പന്നം നഗരത്തിലെ ചെറുകിട കച്ചവടക്കാര്‍ക്കടക്കം വില്‍ക്കുകയാണ് ഇയാളുടെ രീതിയെന്ന് പോലീസ് പറഞ്ഞു.
