ദില്ലി : ഇസ്രായേലും അമേരിക്കയുമായുള്ള സംഘർഷത്തിനിടെ അയൽരാജ്യങ്ങളിലുണ്ടായ മിസൈൽ, ഡ്രോൺ ആക്രമണങ്ങളിൽ ഖേദപ്രകടനവുമായി ഇറാൻ പ്രസിഡന്റ് മസൂദ് പെസെഷ്കിയാൻ. ഇറാനിൽ നിന്നുള്ള ആക്രമണങ്ങൾ നേരിടേണ്ടി വന്ന അയൽരാജ്യങ്ങളോട് വ്യക്തിപരമായും ഇറാന്റെ പേരിലും മാപ്പ് ചോദിക്കുന്നുവെന്ന് സ്റ്റേറ്റ് ടെലിവിഷനിലൂടെ നടത്തിയ പ്രസംഗത്തിൽ അദ്ദേഹം വ്യക്തമാക്കി. ഇറാന് നേരെ ആക്രമണം ഉണ്ടാകാത്ത പക്ഷം ഇനി ഒരു അയൽരാജ്യത്തിന് നേരെയും മിസൈലുകൾ വിക്ഷേപിക്കില്ലെന്ന് ഇടക്കാല നേതൃത്വ കൗൺസിൽ തീരുമാനിച്ചതായും അദ്ദേഹം അറിയിച്ചു. സമാധാനത്തിന്റെ പാത തിരഞ്ഞെടുക്കുമ്പോഴും രാജ്യത്തിന്റെ പരമാധികാരത്തിൽ വിട്ടുവീഴ്ചയില്ലെന്ന് പ്രഖ്യാപിച്ച പ്രസിഡന്റ്, ശത്രുക്കൾക്ക് മുന്നിൽ ഇറാൻ കീഴടങ്ങില്ലെന്നും തങ്ങളുടെ ആത്മവീര്യം തകർക്കാൻ ആർക്കും കഴിയില്ലെന്നും കൂട്ടിച്ചേർത്തു.
ഫെബ്രുവരി 28-ന് അമേരിക്കയും ഇസ്രായേലും സംയുക്തമായി നടത്തിയ ‘ഓപ്പറേഷൻ എപിക് ഫ്യൂറി’ എന്ന വ്യോമാക്രമണത്തിന് പിന്നാലെ പശ്ചിമേഷ്യൻ മേഖലയിൽ സംഘർഷം അതിരൂക്ഷമായിരുന്നു. ഇറാന്റെ പരമോന്നത നേതാവ് ആയത്തുള്ള അലി ഖമേനിയും കുടുംബവും ഈ ആക്രമണത്തിൽ കൊല്ലപ്പെട്ടതോടെയാണ് തിരിച്ചടിയായി ഇറാൻ ഡ്രോണുകളും മിസൈലുകളും തൊടുത്തുവിട്ടത്. ദുബായ്, അബുദാബി, ഖത്തർ, കുവൈറ്റ്, ബഹ്‌റൈൻ തുടങ്ങിയ ഗൾഫ് മേഖലകളിലെ പ്രധാന കേന്ദ്രങ്ങളിൽ ഇറാന്റെ തിരിച്ചടി വലിയ നാശനഷ്ടങ്ങൾ വരുത്തിയിരുന്നു. ദുബായ് വിമാനത്താവളത്തിന് സമീപവും ആഡംബര ഹോട്ടലുകളിലും ഉണ്ടായ ആക്രമണങ്ങൾ ആഗോളതലത്തിൽ തന്നെ വലിയ ആശങ്കകൾക്ക് വഴിവെച്ചു.
അതേസമയം ഇറാൻ ഉയർത്തുന്ന ഭീഷണികൾക്കെതിരെ സൗദി അറേബ്യ ശക്തമായ മുന്നറിയിപ്പുമായി രംഗത്തെത്തിയിട്ടുണ്ട്. തങ്ങളുടെ എണ്ണശുദ്ധീകരണ ശാലകൾക്കും സൈനിക താവളങ്ങൾക്കും നേരെ നടന്ന ആക്രമണശ്രമങ്ങളെ പ്രതിരോധിച്ചതായി സൗദി പ്രതിരോധ മന്ത്രി പ്രിൻസ് ഖാലിദ് ബിൻ സൽമാൻ അറിയിച്ചു. മേഖലയിലെ സ്ഥിതിഗതികൾ വിലയിരുത്തുന്നതിൽ ഇറാന് പിഴവ് സംഭവിക്കരുതെന്നും സുരക്ഷാ കാര്യങ്ങളിൽ വിട്ടുവീഴ്ചയുണ്ടാകില്ലെന്നും സൗദി വ്യക്തമാക്കിയിട്ടുണ്ട്.
