ദില്ലി : ഇന്ത്യൻ പ്രീമിയർ ലീഗിൽ മുംബൈ ഇന്ത്യൻസ് സീസണിലെ തങ്ങളുടെ ആദ്യ വിജയം സ്വന്തമാക്കിയ മത്സരത്തിലും പരാജയമായി സൂര്യകുമാർ യാദവ്. മുംബൈയ്ക്കായി ബാറ്റിങ്ങിനിറങ്ങിയ സൂര്യ ദില്ലിക്കെതിരെ നേരിട്ട ആദ്യ പന്തിൽ തന്നെ വിക്കറ്റ് നഷ്ടമായി പവലിയനിലേക്ക് തിരികെ നടന്നു. മുകേഷ് കുമാറിന്റെ പന്തിൽ കുൽദീപ് യാദവ് ക്യാച്ചെടുത്താണു താരത്തെ പുറത്താക്കിയത്.
കൂനിൽ മേൽ കുരുവെന്നപോലെ മത്സരത്തിനിടെ താരത്തിന് കണ്ണിനു മുകളിൽ പരുക്കേൽക്കുകയും ചെയ്തു. ഫീൽഡ് ചെയ്യുമ്പോഴാണു പന്തു വീണ് സൂര്യയ്ക്കു പരുക്കേറ്റത്. മുംബൈ പേസർ ബെഹ്രൻഡോർഫിന്റെ പന്തിൽ അക്ഷർ പട്ടേൽ ലോങ് ഓണിനു മുകളിലൂടെ സിക്സിനു ശ്രമിക്കവേ പന്ത് സൂര്യകുമാർ പിടിച്ചെടുക്കാൻ ശ്രമിച്ചപ്പോഴാണ് കയ്യിലൊതുങ്ങാതെ മുഖത്ത് വീഴുകയായിരുന്നു.
തുടർന്ന് വേദന സഹിക്കാനാകാതെ ഗ്രൗണ്ടിൽ ഇരുന്ന സൂര്യകുമാർ യാദവിനെ ഉടൻതന്നെ ടീം ഫിസിയോയെത്തി ചികിത്സ നൽകി. ഓസ്ട്രേലിയയ്ക്കെതിരായ ഏകദിന പരമ്പരയിലെ മൂന്നു മത്സരങ്ങളിലും അടുപ്പിച്ച് പൂജ്യത്തിനു പുറത്തായ സൂര്യയ്ക്ക് ഐപിഎല്ലിലും തിളങ്ങാൻ സാധിച്ചിട്ടില്ല. ബാംഗ്ലൂരിനെതിരായ ആദ്യ മത്സരത്തിൽ 15 റൺസ് നേടിയെങ്കിലും ചെന്നൈ സൂപ്പർ കിങ്സിനെതിരെ ഒരു റൺ മാത്രമെടുത്താണു താരം പുറത്തായത്.
