തിരുവനന്തപുരം: സംസ്ഥാനത്ത് മഴ ശക്തമായതിനെ തുടര്ന്ന് തിങ്കളാഴ്ച മുതല് നടത്താനിരുന്ന ഹയര്സെക്കന്ററി ഒന്നാം വര്ഷ സപ്ലിമെന്ററി പരീക്ഷകള് മാറ്റിവെച്ചു. ജൂലൈ 22 മുതല് 29-ാം തീയതി വരെ പരീക്ഷകള് നടത്തുമെന്നാണ് നേരത്തെ അറിയിച്ചിരുന്നത്.
എന്നാല് സംസ്ഥാനത്തിന്റെ പലയിടങ്ങളിലും മഴ ശക്തമായതോടെ പരീക്ഷ നടത്തിപ്പിനുള്ള സാഹചര്യം ഇല്ലാത്തതിനാല് ജൂലൈ 22, 23 തീയതികളില് നടത്താനിരുന്ന പരീക്ഷകള് മാറ്റിയതായി ഹയര്സെക്കന്ററി എക്സാമിനേഷന് ബോര്ഡ് സെക്രട്ടറി അറിയിച്ചു.
പുതുക്കിയ തീയതി പ്രകാരം ജൂലൈ 22 തിങ്കളാഴ്ച നടക്കാനിരുന്ന പരീക്ഷ ജൂലൈ 30നും ജൂലൈ 23 ചൊവ്വ നടക്കാനിരുന്ന പരീക്ഷ ആഗസ്റ്റ് ഒന്നിനും നടത്തും. മറ്റ് തീയതികളിലെ പരീക്ഷകള്ക്കോ ടൈംടേബിളിലോ മാറ്റമുണ്ടാകില്ല.