ദില്ലി : അമേരിക്കൻ പ്രസിഡന്റ് ഡൊണാൾഡ് ട്രമ്പിന്റെ അധിക തീരുവ പ്രഖ്യാപനത്തെ തുടർന്ന് നിർത്തിവച്ച ഇന്ത്യ-അമേരിക്ക . വ്യാപാര കരാർ ചർച്ചകൾ വീണ്ടും ആരംഭിക്കുന്നു. വ്യാപാര കരാറുമായി ബന്ധപ്പെട്ട ആറാം ഘട്ട ചർച്ചകൾക്കായി അമേരിക്കൻ പ്രതിനിധി സംഘം ഇന്ന് ദില്ലിയിൽ എത്തും. നാളെ മുതൽ ചർച്ചകൾ പുനരാരംഭിക്കുമെന്നാണ് കരുതുന്നത്.
അമേരിക്കൻ വ്യാപാര പ്രതിനിധി ബ്രെൻഡൻ ലിഞ്ചാണ് അമേരിക്കൻ. സംഘത്തെ നയിക്കുന്നത്. ഇന്ത്യൻ വാണിജ്യ മന്ത്രാലയത്തിലെ പ്രത്യേക സെക്രട്ടറി രാജേഷ് അഗർവാൾ ഇന്ത്യയെ പ്രതിനിധീകരിച്ച് ചർച്ചകളിൽ പങ്കെടുക്കും. ഇന്ത്യയ്ക്ക് മേൽ തീരുവ ഏർപ്പെടുത്തിയതിന് ശേഷം ഇരു രാജ്യങ്ങളും തമ്മിൽ നേരിട്ട് നടക്കുന്ന ആദ്യത്തെ വ്യാപാര ചർച്ചയാണിത്.
റഷ്യയിൽ നിന്ന് എണ്ണ വാങ്ങുന്നത് സംബന്ധിച്ചാണ് ട്രമ്പ് ഭരണകൂടം ഇന്ത്യക്കെതിരെ നീങ്ങിയത്. തുടർന്ന്, ഇന്ത്യയിൽ നിന്നുള്ള ഉത്പന്നങ്ങൾക്ക് 50 ശതമാനം അധിക തീരുവ ട്രംപ് ഏർപ്പെടുത്തിയിരുന്നു. ഇതിനെത്തുടർന്ന് ഓഗസ്റ്റ് 25-ന് നടക്കാനിരുന്ന ചർച്ചകൾ മാറ്റിവെക്കേണ്ടി വന്നു. റഷ്യക്കെതിരെ യുക്രെയ്ൻ യുദ്ധവുമായി ബന്ധപ്പെട്ട് അമേരിക്ക ഉപരോധം ഏർപ്പെടുത്തിയെങ്കിലും, ഇന്ത്യ റഷ്യയിൽ നിന്ന് എണ്ണ ഇറക്കുമതി ചെയ്യുന്നത് തുടർന്നിരുന്നു. ഇത് അമേരിക്കയുടെ അതൃപ്തിക്ക് കാരണമായി.
ഇന്ത്യയും അമേരിക്കയും തമ്മിലുള്ള വ്യാപാര തടസ്സങ്ങൾ പരിഹരിക്കാനുള്ള ചർച്ചകൾ പുരോഗമിക്കുകയാണെന്ന് കഴിഞ്ഞ ആഴ്ച ട്രംപ് വ്യക്തമാക്കിയിരുന്നു. ഇതിന് പിന്നാലെ, ഇന്ത്യയും അമേരിക്കയും സ്വാഭാവിക പങ്കാളികളാണെന്ന് പ്രധാനമന്ത്രി നരേന്ദ്ര മോദിയും അഭിപ്രായപ്പെട്ടു. ഈ അനുകൂല പ്രസ്താവനകളാണ് വ്യാപാര ചർച്ചകൾ പുനരാരംഭിക്കാൻ വഴി തുറന്നത്.
ഈ ചർച്ചകൾ ഇരു രാജ്യങ്ങൾക്കുമിടയിലെ വാണിജ്യ ബന്ധങ്ങൾ മെച്ചപ്പെടുത്തുന്നതിനും നിലവിലുള്ള പ്രശ്നങ്ങൾ പരിഹരിക്കുന്നതിനും സഹായകമാകുമെന്നാണ് പ്രതീക്ഷ. പുതിയ കാലഘട്ടത്തിൽ വ്യാപാര ബന്ധങ്ങൾ ശക്തിപ്പെടുത്തുന്നത് ഇരു രാജ്യങ്ങൾക്കും സാമ്പത്തികമായി ഗുണം ചെയ്യും.
