ഇന്നത്തെക്കാലത്ത് ഒട്ടുമിക്കപേരും വാസ്തുശാസ്ത്ര പ്രകാരമാണ് വീട് വെയ്ക്കുന്നത്. വീടിന്റെ സന്തോഷത്തിനും ഐശ്വര്യത്തിനും വാസ്തു നോക്കുന്നത് നല്ലതാണെന്നാണ് ഒട്ടുമിക്കയാളുകളുടെയും വിശ്വാസം. എന്നാല്‍ പണച്ചെലവോര്‍ത്ത് വാസ്തു നോക്കാതെ ഇരിക്കുന്ന ആളുകളും ഉണ്ട്.
അത്തരക്കാര്‍ക്ക് അധിക പണ ചെലവില്ലാതെ വാസ്തുദോഷം പരിഹരിക്കാവുന്ന ചില ടിപ്പുകള്‍ അറിയാം.
പ്രധാന വാതില്‍
വീട്ടില്‍ സന്തോഷവും പ്രശ്‌നങ്ങളും കൊണ്ടുവരുന്നത് വീടിന്റെ പ്രധാന വാതിലിലൂടെയാണെന്നാണ് പറയപ്പെടുന്നത്. അതിനാല്‍ തന്നെ വീടിന്റെ പ്രധാന വാതില്‍ എപ്പോഴും വൃത്തിയായി സൂക്ഷിക്കണം. ഇവിടെ മതിയായ വെളിച്ചത്തിനുള്ള ക്രമീകരണം ചെയ്യണം. ഒരു നെയിം പ്ലേറ്റും സ്ഥാപിക്കാവുന്നതാണ്. ഈ നെയിം പ്ലേറ്റ് കറുപ്പ് നിറത്തിലായിരിക്കരുത് എന്നത് ഓര്‍മ്മിക്കുക. ശനിയാഴ്ച ദിവസം ഗേറ്റിന് സമീപം വിളക്ക് കൊളുത്തുന്നത് നല്ലതാണ്.
കോണിപ്പടികള്‍
വീട്ടിലെ പടികള്‍ വീടിന്റെ പുരോഗതിയുമായി ബന്ധപ്പെട്ടിരിക്കുന്നു. രാഹു-കേതുക്കളെ വീടിന്റെ കോണിപ്പടികളില്‍ നിന്ന് നിയന്ത്രിക്കാം .തെറ്റായി പണിഞ്ഞ കോണിപ്പടികള്‍ ജീവിതത്തില്‍ പെട്ടെന്നുള്ള പ്രശ്‌നങ്ങള്‍ സൃഷ്ടിക്കാം. തെക്കുപടിഞ്ഞാറന്‍ കോണില്‍ പടികള്‍ പണിയുന്നത് ഏറ്റവും മികച്ചതായി കണക്കാക്കപ്പെടുന്നു. പടികള്‍ എപ്പോഴും വടക്ക് നിന്ന് തെക്ക് ദിശയിലോ കിഴക്ക് നിന്ന് പടിഞ്ഞാറ് ദിശയിലോ ആയിരിക്കണം നിര്‍മ്മിക്കേണ്ടത്.
ലിവിങ് ഏരിയ
വീടിന്റെ സന്തോഷവും ബന്ധങ്ങളും ഈ സ്ഥലത്ത് കാണാം. ലിവിങ് ഏരിയ വൃത്തിയായി സൂക്ഷിക്കുന്നതിലൂടെ വിഷാദവും സമ്മര്‍ദ്ദവും ഒഴിവാക്കാം. ഈ സ്ഥലത്ത് എപ്പോഴും ലൈറ്റ് ഓണാക്കി വയ്ക്കുക. നേരിയ സുഗന്ധത്തിനായി എയര്‍ ഫ്രഷ്‌നര്‍ ക്രമീകരിക്കാവുന്നതാണ്. പൂക്കളോ പൂക്കളുടെ ചിത്രങ്ങളോ ഇവിടെ വെക്കാവുന്നതാണ്. ഒരിക്കലും ഷൂസുകളും ചെരിപ്പുകളും ഇവിടെ സൂക്ഷിക്കരുത്.
വീടിന്റെ അടുക്കള
വീട്ടിലെ ആളുകളുടെ ആരോഗ്യം അടുക്കളയുമായി ബന്ധപ്പെട്ടിരിക്കുന്നുവെന്നാണ് വിശ്വാസം. അടുക്കളയില്‍ മതിയായ സൂര്യപ്രകാശം ഉണ്ടെങ്കില്‍ അത് വളരെ നല്ലതാണ്. അടുക്കളയില്‍ എപ്പോഴും സാധനങ്ങള്‍ അടുക്കിപ്പെറുക്കി വെക്കുക.
കിടപ്പുമുറി
വീടിന്റെ സന്തോഷവും സമൃദ്ധിയും കിടപ്പ് മുറിയിലാണുളളത്. കിടപ്പുമുറിയുടെ ഭിത്തികളുടെ നിറം എപ്പോഴും ഇളം നിറത്തില്‍ സൂക്ഷിക്കുക. ഇളം പച്ചയോ പിങ്ക് നിറമോ നല്ലതാണ്. കിടപ്പുമുറിയില്‍ ടിവി വെയ്ക്കുന്നത് അത്ര അഭികാമ്യമല്ല. എന്നാല്‍ ഇവിടെ ലൈറ്റ് മ്യൂസിക് ക്രമീകരിക്കാവുന്നതാണ്. ഇവിടെ ഇരുന്ന് ഭക്ഷണം കഴിക്കുന്നത് പരമാവധി ഒഴിവാക്കുക. കിടപ്പുമുറിയില്‍ സൂര്യപ്രകാശവും വായുവും യഥേഷ്ടം പ്രവേശിക്കുന്നുണ്ടെന്ന് ഉറപ്പാക്കുക
കുളിമുറി
വീട്ടിലെ കുളിമുറി എപ്പോഴും വൃത്തിയായി സൂക്ഷിക്കുക. ഇവിടെ വെള്ളം പാഴാക്കരുത്. കുളിമുറിയുല്‍ നീല അല്ലെങ്കില്‍ പര്‍പ്പിള്‍ നിറം ഉപയോഗിക്കുന്നത് വളരെ ഗുണം ചെയ്യും. കുളിമുറിയില്‍ നേരിയ സുഗന്ധം വെക്കുന്നതും നല്ലതാണ്.
