തിരുവനന്തപുരം : മലയാള ചലച്ചിത്രരംഗത്തെ ആയുഷ്കാല സംഭാവനയ്ക്കുള്ള 2024ലെ ജെ സി ഡാനിയേല് പുരസ്കാരം നടി ശാരദയ്ക്ക്. ശ്രീകുമാരന് തമ്പി ചെയര്പേഴ്സണും നടി ഉര്വശി, സംവിധായകന് ബാലു കിരിയത്ത് എന്നിവര് അംഗങ്ങളും ചലച്ചിത്ര അക്കാദമി സെക്രട്ടറി സി അജോയ് മെമ്പര് സെക്രട്ടറിയുമായ സമിതിയാണ് പുരസ്കാര ജേതാവിനെ തെരഞ്ഞെടുത്തത്. അഞ്ചു ലക്ഷം രൂപയും പ്രശസ്തിപത്രവും ശില്പ്പവും അടങ്ങുന്നതാണ് അവാര്ഡ്. കേരള സര്ക്കാരിന്റെ പരമോന്നത ചലച്ചിത്രബഹുമതി ലഭിക്കുന്ന 32-ാമത്തെ ചലച്ചിത്രപ്രതിഭയാണ് ശാരദ. പുരസ്കാരം ജനുവരി 25ന് തിരുവനന്തപുരം നിശാഗന്ധിയില് നടക്കുന്ന കേരള സംസ്ഥാന ചലച്ചിത്ര അവാര്ഡ് സമര്പ്പണച്ചടങ്ങില് സമ്മാനിക്കും.
1968 ല് തുലാഭാരം, 1972 ല് അടൂര് ഗോപാലകൃഷ്ണന്റെ സ്വയംവരം, 1977 ല് തെലുങ്ക് ചിത്രമായ നിമജ്ജനം എന്നിവയിലെ അഭിനയത്തിന് ദേശീയ പുരസ്കാരവും ശാരദ നേടിയിരുന്നു.
1945 ജൂണ് 25ന് ആന്ധ്രപ്രദേശിലെ തെനാലി ഗ്രാമത്തില് വെങ്കിടേശ്വര റാവുവിന്റെയും സത്യവാണി ദേവിയുടെയും മകളായി ജനിച്ച സരസ്വതീദേവി ഇരുമിത്രലു എന്ന ആദ്യ തെലുങ്കു ചിത്രത്തില് അഭിനയിക്കുമ്പോഴാണ് ശാരദ എന്ന പേര് സ്വീകരിച്ചത്. മുട്ടത്തു വര്ക്കി രചിച്ച് കുഞ്ചാക്കോ സംവിധാനം ചെയ്ത ഇണപ്രാവുകള് എന്ന ചിത്രത്തിലൂടെ 1965ല് മലയാള സിനിമയില് അരങ്ങേറി. തുടര്ന്ന്, എംടിയുടെ തിരക്കഥയില് വിന്സെന്റ് സംവിധാനം ചെയ്ത മുറപ്പെണ്ണ്, എംടിയുടെ തന്നെ തിരക്കഥയില് പി ഭാസ്കരന് സംവിധാനം ചെയ്ത ഇരുട്ടിന്റെ ആത്മാവ് എന്നീ ചിത്രങ്ങളിലൂടെ ശാരദ മലയാളത്തിന്റെ പ്രിയങ്കരിയായി. ഉദ്യോഗസ്ഥ, യക്ഷി, അടിമകള്, അസുരവിത്ത്, കൂട്ടുകുടുംബം, നദി, ഏണിപ്പടികള്, എലിപ്പത്തായം, രാപ്പകല് തുടങ്ങി 125 ഓളം മലയാള സിനിമകളില് വേഷമിട്ടിട്ടുണ്ട്.
