തെന്നിന്ത്യൻ പ്രേക്ഷകരുടെ പ്രിയ താരജോഡികളാണ് സൂര്യയും ജ്യോതികയും. ഇരുവരും ഇന്ന് 15-ാമത് വിവാഹ വാർഷികം ആഘോഷിക്കുകയാണ്. വിവാഹ ദിനത്തോടനുബന്ധിച്ച് ഇൻസ്റ്റഗ്രാം പേജിലൂടെ തന്റെ സന്തോഷം പങ്കിട്ടിരിക്കുകയാണ് ജ്യോതിക.
“15 വർഷത്തെ സന്തോഷം… എല്ലാ അനുഗ്രഹങ്ങൾക്കും, സ്നേഹത്തിനും എല്ലാവർക്കും നന്ദി…” എന്നാണ് സൂര്യയ്ക്കൊപ്പമുളള ചിത്രം പങ്കുവെച്ചുകൊണ്ട് ജ്യോതിക കുറിച്ചത്. നീയാണെന്റെ അനുഗ്രഹം ജോ എന്നായിരുന്നു സൂര്യയുടെ വാക്കുകൾ.
2006 സെപ്റ്റംബർ 11 നായിരുന്നു സൂര്യ-ജ്യോതിക വിവാഹം. നീണ്ട വർഷത്തെ പ്രണയത്തിന് ശേഷമായിരുന്നു ഇരുവരുടെയും വിവാഹം. വിവാഹശേഷം അഭിനയത്തിൽനിന്നും വർഷങ്ങളോളം വിട്ടുനിന്ന ജ്യോതിക ’36 വയതിനിലെ’ എന്ന സിനിമയിലൂടെയാണ് മടങ്ങി വന്നത്. അതിനുശേഷം അഭിനയത്തിൽ ജ്യോതിക സജീവമാണ്. ഇരുവർക്കും ദിയ, ദേവ് എന്നീ രണ്ടു മക്കളുണ്ട്.
അതേസമയം സമൂഹ മാധ്യമങ്ങളിൽ നിന്നും വിട്ട് നിന്ന ജ്യോതിക അടുത്തിടെയാണ് ഇൻസ്റ്റാഗ്രാമിൽ അക്കൗണ്ട് തുടങ്ങിയത്. എന്നാൽ ആരാധകരെ അത്ഭുതപ്പെടുത്തികൊണ്ട് ഒറ്റദിവസം കൊണ്ട് 1.2 മില്യൺ ഫോളോവേഴ്സിനെയാണ് താരം സ്വന്തമാക്കിയത്. തുടർന്ന് ഹിമാലയൻ യാത്രയിൽ നിന്നുള്ള ചിത്രമാണ് ഇൻസ്റ്റഗ്രാമിൽ ആദ്യമായി ജ്യോതിക ഷെയർ ചെയ്തത്. “മൈ പൊണ്ടാട്ടി സ്ട്രോങ്ങസ്റ്റ്. ഇൻസ്റ്റയിൽ കണ്ടതിൽ സന്തോഷം,” എന്നാണ് ചിത്രങ്ങൾക്ക് സൂര്യ കമന്റ് ചെയ്തത്.
