ദില്ലി: മുൻ വിദേശകാര്യ മന്ത്രി കെ നട്വർ സിങ് അന്തരിച്ചു. ദീർഘനാളത്തെ അസുഖത്തെ തുടർന്ന് ചികിത്സയിലായിരുന്ന അദ്ദേഹം ശനിയാഴ്ച രാത്രിയോടെയാണ് അന്തരിച്ചത്. 93 വയസ്സായിരുന്നു. ദില്ലിക്കടുത്ത് ഗുരുഗ്രാമിലെ മേദാന്ത ആശുപത്രിയിൽ കഴിഞ്ഞ രണ്ടാഴ്ചയായി അദ്ദേഹം ചികിത്സയിലായിരുന്നു.
മൻമോഹൻ സിങ് പ്രധാനമന്ത്രിയായിരുന്ന 2004-05 കാലത്ത് വിദേശകാര്യ മന്ത്രിയായിരുന്നു. എഴുത്തുകാരനും ചരിത്രകാരനുമായ നട്വർ സിങ്, നേരത്തെ ഐഎഫ്എസ് ഉദ്യോഗസ്ഥനായിരുന്നു.
1931ൽ രാജസ്ഥാനിലെ ഭരത്പൂർ ജില്ലയിലാണ് നട്വർ സിംഗ് ജനിച്ചത്. വിദേശകാര്യ സർവിസിൽ നയതന്ത്രജ്ഞനായിരുന്ന അദ്ദേഹം പിന്നീട് രാഷ്ട്രീയത്തിലേക്ക് ചുവടുമാറ്റുകയായിരുന്നു. 1953ൽ ഇന്ത്യൻ ഫോറിൻ സർവീസ് ഓഫീസറായിരുന്ന അദ്ദേഹം 1984ൽ രാജസ്ഥാനിലെ ഭരത്പൂരിൽ നിന്ന് മത്സരിച്ച് ലോക്‌സഭാ എംപിയായതോടെ നേരത്തെ വിരമിച്ചു.
1985-86 കാലഘട്ടത്തിൽ രാജീവ് ഗാന്ധി സർക്കാറിൽ ഇരുമ്പുരുക്ക്, ഖനി, കാർഷിക വകുപ്പ് മന്ത്രിയായും പ്രവർത്തിച്ചിരുന്നു. പിന്നീട് 1986 മുതൽ 89 വരെ വിദേശകാര്യ സഹമന്ത്രിയായും പ്രവർത്തിച്ചു. യു.കെയിലെ ഇന്ത്യൻ ഡെപ്യൂട്ടി ഹൈകമ്മിഷണറായും സാംബിയയിലെ ഇന്ത്യൻ ഹൈകമ്മിഷണറായും പ്രവർത്തിച്ചു. ഇന്ത്യ-പാക് ബന്ധം നിർണായകമായ 1980-82 കാലത്ത് പാകിസ്ഥാനിലെ ഇന്ത്യൻ അംബാസഡറായിരുന്നു.
2005 ല്‍ വിദേശകാര്യ മന്ത്രിയായിരിക്കെ ഇറാഖില്‍ നിന്നും എണ്ണയ്ക്ക് പകരം ഭക്ഷണം പദ്ധതി കുംഭകോണത്തില്‍ ആരോപണ വിധേയനായ നട്വര്‍ സിങ് രാജിവച്ചു. പിന്നാലെ 2008ഓടെ കോണ്‍ഗ്രസ് വിട്ടു. പിന്നീട് ബിഎസ്‌പിയില്‍ ചേര്‍ന്നെങ്കിലും പാര്‍ട്ടി വിരുദ്ധ പ്രവര്‍ത്തനങ്ങളുടെ പേരില്‍ നട്വർ സിങ്ങിനെ ബിഎസ്‌പിയും പുറത്താക്കി.
1984ല്‍ രാജ്യം പദ്മഭൂഷണ്‍ നല്‍കി അദ്ദേഹത്തെ ആദരിച്ചു. ലെഗസി ഓഫ് നെഹ്‌റു: എ മെമ്മോറിയൽ ട്രിബ്യൂട്ട്, മൈ ചൈന ഡയറി 1956-88, വൺ ലൈഫ് ഈസ് നോട്ട് ഇനഫ് (ആത്മകഥ) തുടങ്ങി നിരവധി പുസ്തകങ്ങൾ രചിച്ചിട്ടുണ്ട്. വണ്‍ ലൈഫ് ഈസ് നോട്ട് ഇനഫിലൂടെ വിവാദ വെളിപ്പെടുത്തലുകളും നട്വര്‍ സിങ് നടത്തിയിരുന്നു.
