മഞ്ചേശ്വരം: കാസര്കോട് ജില്ലയിലെ മഞ്ചേശ്വരം നിയമസഭാ സീറ്റ് സംമ്പന്ധിച്ച തിരഞ്ഞെടുപ്പ് കേസ് പിന്വലിക്കാന് അനുമതി തേടി ബിജെപി ജനറല് സെക്രട്ടറി കെ സുരേന്ദ്രന് സമര്പ്പിച്ച ഹര്ജി ഹൈക്കോടതി ഇന്ന് പരിഗണിക്കും. യുഡിഎഫ് സ്ഥാനാര്ത്ഥി അബ്ദുല് റസാഖിന്റെ വിജയം കള്ളവോട്ടിനെ തുടര്ന്നാണെന്നായിരുന്നു സുരേന്ദ്രന്റെ ഹര്ജി.
എന്നാല് കേസിലെ സാക്ഷികള്ക്ക് സമന്സ് പോലുമെത്തിക്കാന് കഴിയാത്ത സാഹചര്യത്തില് മുഴുവന് സാക്ഷികളെയും വിസ്തരിക്കുക പ്രായോഗികമല്ലെന്ന് ചൂണ്ടിക്കാട്ടിയാണ് പിന്മാറ്റം. 2016 ലെ തെരഞ്ഞെടുപ്പില് യുഡിഫിലെ പി ബി അബ്ദുല് റസാഖിനോട് 89 വോട്ടുകള്ക്കായിരുന്നു സുരേന്ദ്രന് പരാജയപ്പെട്ടത്. മരിച്ച ആളുകളുടെ വോട്ടുകള് പോലും റസാഖിന് അനുകൂലമായി പോള് ചെയ്തെന്നും ഇത് ഒഴിവാക്കിയാല് വിജയം തനിക്കാകുമെന്നും സുരേന്ദ്രന് പറയുന്നു. കേസ് ഹൈക്കോടതി പരിഗണനയില് ഇരിക്കെ കഴിഞ്ഞ ഒക്ടോബറില് അബ്ദുല് റസാഖ് മരണപ്പെട്ടു. എന്നാല് അന്ന് തെരഞ്ഞെടുപ്പ് കേസ് ഒഴിവാക്കാന് സുരേന്ദ്രന് തയ്യാറല്ലായിരുന്നു.
ഇതേതുടര്ന്ന് പി ബി അബ്ദുല് റസാഖ് എംഎല്എയുടെ മകന് കേസില് കക്ഷി ചേരുകയായിരുന്നു. എന്നാല് ഇതിനിടെ ലോകസഭാ തിരഞ്ഞെടുപ്പ് കടന്നുവന്നതോടെ കേസ് പിന്വലിക്കാന് അനുമതി തേടി സുരേന്ദ്രന് ഹൈക്കോടതിയെ സമീപിക്കുകയായിരുന്നു.