തിരുവനന്തപുരം: കെഎസ് ഇബി ഭുമി പതിച്ചനല്‍കലിലെ ക്രമക്കേട് സമഗ്രമായി അന്വേഷിക്കണമെന്ന് ബി.ജെ.പി (BJP) സംസ്ഥാന അദ്ധ്യക്ഷൻ കെ. സുരേന്ദ്രൻ. മുൻ മന്ത്രി എംഎം മണിക്ക് ദക്ഷിണാഫ്രിക്കയിലടക്കം നിക്ഷേപമുണ്ടെന്നും എംഎം മണിക്കും സഹോദരനും ശതകോടിയിലധികം ആസ്തിയുണ്ടെന്നും സുരേന്ദ്രൻ ആരോപിച്ചു. കെഎസ്ഇബി സംബന്ധിച്ച് പുറത്ത് വന്നിരിക്കുന്നത് മഞ്ഞു മലയുടെ അറ്റം മാത്രമാണെന്നും സർക്കാർ ഖജനാവിന് വലിയ നഷ്ടം ഉണ്ടായ നടപടികളാണ് സ്വീകരിച്ചതെന്നും കെ സുരേന്ദ്രൻ പറഞ്ഞു.
രാജ്യത്ത് ഏകീകൃത സിവില്‍ നിയമം വരുമെന്ന് അദ്ദേഹം വ്യക്തമാക്കി. ഏകീകൃതസിവില്‍ നിയമം ബിജെപിയുടെ രഹസ്യ അജണ്ടയല്ല, പരസ്യമായ കാര്യമാണ്. എല്ലാവിഭാഗങ്ങള്‍ക്കും തുല്യപരിഗണന നല്‍കുകയാണ് ഏകീകൃത നിയമത്തിന്റെ ലക്ഷ്യമെന്നും കെ സുരേന്ദ്രന്‍ പറഞ്ഞു.
കെ റെയിലിന് കേന്ദ്ര ഗവണ്‍മെന്റ് പച്ചക്കൊടി കാണിച്ചിട്ടില്ല. സര്‍വെ നടത്തി പാവപ്പെട്ടവരെ ഭയാശങ്കയാക്കുകയാണ് പിണറായി ചെയ്യുന്നത്. ഖജനാവിലെ പണം എടുത്ത് അനാവശ്യമായി സര്‍വെ നടത്തിയത് കൊണ്ട് കാര്യമില്ലെന്നും കെ റെയില്‍ സംസ്ഥാനത്ത് കൊണ്ടുവരാന്‍ തങ്ങള്‍ അനുവദിക്കില്ലെന്നും സുരേന്ദ്രന്‍ കൂട്ടിച്ചേർത്തു.
