മുംബൈ: ബോളിവുഡ് നടി കങ്കണ റണാവത്തിന്റെ ഓഫീസിലെ അനധികൃത നിർമാണങ്ങൾ പൊളിച്ചുനീക്കിയതിന് പിന്നാലെ ഫാഷൻ ഡിസൈനർ മനീഷ് മൽഹോത്രയ്ക്കും ബിഎംസിയുടെ നോട്ടീസ്. ഓഫീസിൽ അനധികൃത രൂപമാറ്റം വരുത്തിയെന്ന് ചൂണ്ടിക്കാട്ടിയാണ് നോട്ടീസ് അയച്ചിരിക്കുന്നത്. ഒരാഴ്ചയ്ക്കകം മറുപടി നൽകണമെന്ന് ബിഎംസി ആവശ്യപ്പെട്ടു.
അതേസമയം, പൊളിച്ചുനീക്കലിനെതിരെ കങ്കണ റണാവത്ത് സമർപ്പിച്ച ഹർജി മുംബൈ ഹൈക്കോടതി ഇന്ന് ഉച്ചയ്ക്ക് മൂന്ന് മണിക്ക് പരിഗണിക്കും. നടിയുടെ പ്രൊഡക്ഷൻ കമ്പനിയായ മണികർണിക ഫിലിംസ് പ്രവർത്തിക്കുന്ന ഓഫീസിന്റെ ഒരു ഭാഗം ഇന്നലെ കോര്പ്പറേഷന് പൊളിച്ചുനീക്കിയിരുന്നു. ഇതിന് പിന്നാലെയാണ് പൊളിക്കൽ നടപടികൾക്ക് ഹൈക്കോടതിയുടെ സ്റ്റേ ഉത്തരവുണ്ടായത്.