പാലക്കാട്: സദാചാര ആക്രമണ കേസിൽ കരിമ്പ സർക്കാർ ഹയർ സെക്കണ്ടറി സ്കൂളിലെ പി ടി എ വൈസ് പ്രസിഡന്റ് എ.എസ് ജാഫർ അലി രാജിവെച്ചു. സദാചാരഗുണ്ടകളിൽ നിന്ന് ആക്രമണം നേരിട്ട വിദ്യാർഥികൾക്കെതിരെ ജാഫർ അലി വിവാദ പരമർശം നടത്തിയിരുന്നു. ഇന്നലെ നടന്ന പി ടി എ എക്സിക്യൂട്ടീവ് യോഗത്തിൽ ഇതിനെതിരെ വലിയ പ്രതിഷേധം ഉയർന്നിരുന്നു. തുടർന്നാണ് എ എസ് ജാഫർ അലി പി ടി എ വൈസ് പ്രസിഡന്റ് സ്ഥാനം രാജിവെച്ചത്.
അതേസമയം, സ്കൂൾ വിദ്യാർഥികളുടെ സുരക്ഷയ്ക്കായി ബസ് സ്റ്റോപ്പിൽ പോലീസ് സാന്നിധ്യം ഉറപ്പാക്കാൻ തീരുമാനം. സ്കൂളിൽ ചേർന്ന പിടിഎ എക്സിക്യുട്ടീവ് യോഗമാണ് ബസ് സ്റ്റോപ്പിൽ പോലീസ് സാന്നിധ്യം ആവശ്യപ്പെടാൻ തീരുമാനിച്ചത്. കൂടാതെ അധ്യാപകരുടെ സാന്നിധ്യവും ബസ് സ്റ്റോപ്പിൽ ഉറപ്പാക്കും. വിഷയത്തിൽ തർക്കം പരിഹരിക്കാൻ സർവകക്ഷി യോഗം വിളിക്കും.
നാട്ടുകാരേയും രക്ഷിതാക്കളേയും രാഷ്ട്രീയ പാർട്ടി പ്രതിനിധികളേയും യോഗത്തിൽ പങ്കെടുപ്പിക്കും. വിദ്യാർഥികൾക്ക് യാതൊരു തരത്തിലുള്ള ബുദ്ധിമുട്ടുകളും സ്കൂളിലേക്ക് വരുമ്പോൾ ഉണ്ടാകില്ലെന്നും എല്ലാ വിധ സംരക്ഷണവും കുട്ടികൾക്ക് ഉറപ്പാക്കുമെന്നും സ്കൂൾ അധികൃതർ വ്യക്തമാക്കി.
