എറണാകുളം: വയനാട് ദുരന്തത്തിൽ കേന്ദ്ര സഹായത്തിന് വേണ്ടിയുള്ള 2219 കോടിയുടെ മെമ്മോറാണ്ടം സമർപ്പിച്ചത് ഈ മാസം 16 ന് മാത്രമാണെന്നും ബന്ധപ്പെട്ട സമിതി അത് പരിശോധിച്ചുവരികയാണെന്നും തീരുമാനം ഉടൻ ഉണ്ടാകുമെന്നും കേന്ദ്ര സർക്കാർ. ഹൈക്കോടതിയിൽ സമർപ്പിച്ച സത്യവാങ്മൂലത്തിലാണ് സംസ്ഥാന സർക്കാർ പ്രചാരണം പച്ചക്കള്ളമാണെന്ന് തെളിയിക്കുന്ന വിവരങ്ങളുള്ളത്. മെമ്മോറാണ്ടം നൽകി മാസങ്ങൾ കഴിഞ്ഞിട്ടും കേന്ദ്രം സഹായ ധനം അനുവദിക്കുന്നില്ലെന്നും പ്രധാനമന്ത്രി വാക്കു പാലിച്ചില്ലെന്നും അദ്ദേഹം വയനാട് എത്തിയത് ഫോട്ടോ ഷൂട്ടിന് വേണ്ടിയായിരുന്നു എന്നും ഇടത് വലത് മുന്നണികൾ വയനാട് ഉപതെരഞ്ഞെടുപ്പിന്റെ പശ്ചാത്തലത്തിൽ വ്യാപകമായി പ്രചരിപ്പിച്ചിരുന്നു. എന്നാൽ സെപ്റ്റംബർ മാസം 17 ന് നൽകിയത് വയനാട് ദുരന്തവുമായി ബന്ധപ്പെട്ട് സംസ്ഥാന സർക്കാരിന്റെ ചെലവുകളുടെ കണക്കിനെയാണ് അധിക സഹായത്തിനുള്ള മെമ്മോറാണ്ടമായി തെറ്റിദ്ധരിപ്പിച്ച് വ്യാപകമായി പ്രചാരണം നടത്തിയത്.
ദുരന്ത പുനരധിവാസത്തിന് വേണ്ടിയുള്ള സഹായാഭ്യർത്ഥന നൽകിയിട്ടില്ലെന്ന കാര്യം സംസ്ഥാന സർക്കാർ മറച്ചുവച്ചു. ഇതാണ് ഇപ്പോൾ കേന്ദ്ര സത്യവാങ്മൂലത്തിലൂടെ പുറത്തുവന്നത്. സംസ്ഥാനത്തിന് ദുരന്ത നിവാരണ നിധിയിലേക്ക് അനുവദിച്ച പണത്തിന് പുറമെ 153 കോടി അധികമായി അനുവദിച്ചു. ദുരന്ത ഭൂമിയിൽ ഭക്ഷണവും മറ്റും എയർ ഡ്രോപ്പ് ചെയ്യാൻ ചെലവായ തുകയും അവശിഷ്ടങ്ങൾ നീക്കം ചെയ്യുന്നതിന് ആവശ്യമായ തുകയും അധികമായി അനുവദിച്ചു. നവംബർ 16 ന് ലഭിച്ച മെമ്മോറാണ്ടം പ്രകാരമുള്ള തുക അനുവദിക്കാനുള്ള നടപടിക്രമങ്ങൾ പുരോഗമിക്കുന്നതായും കേന്ദ്ര സർക്കാർ ഇന്ന് ഹൈക്കോടതിയെ അറിയിച്ചു.
കേന്ദ്ര സത്യവാങ്മൂലം കേട്ട ഹൈക്കോടതി ഇടത് വലത് മുന്നണികളെ നിശിതമായി വിമർശിച്ചു. കേന്ദ്ര അവഗണനയ്‌ക്കെതിരെ ഇരു മുന്നണികളും വയനാട്ടിൽ ഹർത്താൽ നടത്തിയതിനെ ആയിരുന്നു കോടതി വിമർശിച്ചത്. ദുരന്ത ബാധിതരായ ജനങ്ങളോടുള്ള വെല്ലുവിളിയാണ് ഹർത്താലെന്നും കോടതി പറഞ്ഞു.
