കോഴിക്കോട്: നിരോധനാജ്ഞ ലംഘിച്ച് മദ്യം കടത്തിയത് ചോദ്യം ചെയ്ത ജനം ടി വി വാർത്താ സംഘത്തിന് മർദ്ദനമേറ്റ സംഭവത്തിൽ കേരള പത്രപ്രവര്‍ത്തക യൂണിയന്‍ കോഴിക്കോട് ജില്ലാ കമ്മിറ്റി പ്രതിഷേധിച്ചു. ആക്രമികൾക്കെതിരെ വധശ്രമത്തിന് കേസെടുത്ത് നിയമത്തിന് മുന്നില്‍ കൊണ്ടുവരാന്‍ പോലീസ് തയ്യാറാവണമെന്ന് പത്രപ്രവര്‍ത്തക യൂണിയന്‍ ജില്ലാ പ്രസിഡന്‍റ് എം ഫിറോസ് ഖാനും സെക്രട്ടറി പി എസ്. രാകേഷും ആവശ്യപ്പെട്ടു.

കോവിഡ് 19 രോഗഭീതി നിലനില്‍ക്കുന്ന കാലത്ത് മറ്റെല്ലാവരും വീട്ടിലിരിക്കുമ്പോള്‍ സ്വന്തം ജീവന്‍ പോലും അപകടത്തിലാക്കി തൊഴിലെടുക്കാനിറങ്ങുന്നവരാണ് മാധ്യമപ്രവര്‍ത്തകര്‍. ഈ സാഹചര്യത്തില്‍ വാര്‍ത്ത ശേഖരിക്കാന്‍ പോയവരെ ആക്രമിച്ചവര്‍ക്കെതിരെ കടുത്ത നടപടിയെടുക്കണമെന്നും പത്രപ്രവര്‍ത്തക യൂണിയന്‍ കോഴിക്കോട് ജില്ലാ കമ്മിറ്റി പ്രസ്താവനയില്‍ ആവശ്യപ്പെട്ടു.

കോഴിക്കോട് വെള്ളയിലാണ് സര്‍ക്കാര്‍ ബിവറേജസ് ഗോഡൗണില്‍ ചട്ടം ലംഘിച്ച് മദ്യം ഇറക്കുന്ന വാര്‍ത്ത റിപ്പോര്‍ട്ട് ചെയ്യാനെത്തിയ മാധ്യമ പ്രവർത്തകരെ സി ഐ ടി യു ഗുണ്ടകൾ വളഞ്ഞിട്ട് ആക്രമിച്ചത്. നിരോധനാജ്ഞ നിലനിൽക്കെ സര്‍ക്കാര്‍ നിര്‍ദ്ദേശിച്ച യാതൊരു സുരക്ഷാ മാനദണ്ഡങ്ങളും പാലിക്കാതെയാണ് മദ്യം ഇറക്കിയത്.

ഇതിന്‍റെ ദൃശ്യങ്ങള്‍ ചിത്രീകരിക്കുന്നത് തടഞ്ഞ അക്രമി സംഘം റിപ്പോര്‍ട്ടര്‍ എ എന്‍. അഭിലാഷ്, ക്യാമറാമാന്‍ കെ ആര്‍. മിഥുന്‍ എന്നിവരെ വളഞ്ഞിട്ട് ആക്രമിച്ചു. അഭിലാഷിന്‍റെ കരണത്തടിക്കുകയും കൈയില്‍ നിന്ന് മൈക്ക് പിടിച്ചു വാങ്ങുകയും മാസ്‌ക് പിടിച്ചുപറിക്കുകയും ചെയ്തു. ദൃശ്യങ്ങള്‍ ഡിലീറ്റ് ചെയ്യണമെന്ന് സംഘം ആക്രോശിക്കുകയായിരുന്നു. സവാദ്, റിയാസ് എന്നിവരുടെ നേതൃത്വത്തിലാണ് ആക്രമണം നടന്നത്. ഒടുവിൽ പൊലീസെത്തിയാണ് മാധ്യമ സംഘത്തെ രക്ഷിച്ചത്. പരുക്കേറ്റ അഭിലാഷും മിഥുനും ഇപ്പോള്‍ സ്വകാര്യ ആശുപത്രിയില്‍ ചികിത്സയിലാണ്.

LEAVE A REPLY

Please enter your comment!
Please enter your name here