കൊച്ചി: കൊട്ടിയൂർ പീഡനക്കേസ് (Kottiyoor Rape Case) പ്രതി റോബിൻ വടക്കുംചേരിക്ക് ശിക്ഷയിൽ ഇളവ്. ഹൈക്കോടതിയാണ് ശിക്ഷയിൽ ഇളവ് നൽകിയത്.അതോടൊപ്പം റോബിന് ഒരു ലക്ഷം രൂപ പിഴയൊടുക്കണമെന്നും ഹൈക്കോടതി ഉത്തരവിട്ടു. അതേസമയം പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ചു ഗര്ഭിണിയാക്കിയെന്ന കേസില് വൈദികന് ആയിരുന്ന റോബിന് വടക്കുംചേരിക്ക് ആദ്യം 20 വര്ഷം കഠിന തടവാണ് വിചാരണക്കോടതി വിധിച്ചത്. ഇതാണ് ഇപ്പോൾ 10 വർഷമാക്കികുറച്ചത്.
പതിനാറുകാരിയെയാണ് സ്വന്തം മുറിയില് വച്ച് റോബിന് വടക്കുംചേരി പീഡിപ്പിച്ച് ഗര്ഭിണിയാക്കിയത്. കംപ്യൂട്ടര് പഠിക്കാനായി എത്തിയതായിരുന്നു പെൺകുട്ടി. കൂത്തുപറമ്പ് ക്രിസ്തുരാജ് ആശുപത്രിയിലായിരുന്നു പെണ്കുട്ടിയുടെ പ്രസവം. ചൈല്ഡ് ലൈന് ലഭിച്ച രഹസ്യ വിവരം പൊലീസിനു കൈമാറിയതോടെ കേസ് റജിസ്റ്റര് ചെയ്തു. തൊട്ടുപിന്നാലെ ആശുപത്രി അധികൃതരുടെ സഹായത്തോടെ പെണ്കുട്ടിയെയും കുഞ്ഞിനെയും വയനാട് വൈത്തിരി ദത്തെടുക്കല് കേന്ദ്രത്തിലാക്കി. 2017 ഫെബ്രുവരിയില് റോബിന് വടക്കുംചേരിയെ കസ്റ്റഡിയിലെടുത്തു. പിന്നാലെ അറസ്റ്റും രേഖപ്പെടുത്തി. ആശുപത്രി അധികൃതര് അടക്കം ആകെ പത്ത് പേര് കേസില് അറസ്റ്റിലായി.
എന്നാല് ക്രിസ്തുരാജ് ആശുപത്രിയിലെ രണ്ട് ഡോക്ടര്മാരെയും അഡ്മിനിസ്ട്രേറ്ററെയും വിടുതല് ഹര്ജി അംഗീകരിച്ച് സുപ്രീംകോടതി കുറ്റവിമുക്തരാക്കി. വിചാരണയ്ക്കിടെ പെണ്കുട്ടിയും മാതാപിതാക്കളും കൂറുമാറി. പ്രായപൂര്ത്തി ആയെന്നും ഇത് തെളിയിക്കാന് ശാസ്ത്രീയ പരിശോധന വേണമെന്നും ഇവര് ആവശ്യപ്പെട്ടു. ഇതേ ആവശ്യവുമായി റോബിനും കോടതിയെ സമീപിച്ചു. ഇരു കൂട്ടരുടെയും ആവശ്യം പോക്സോ കോടതി തള്ളുകയായിരുന്നു.