ചെന്നൈ: അന്തരിച്ച പ്രശസ്ത പിന്നണി ഗായിക വാണി ജയറാമിന്റെ സംസ്കാര ചടങ്ങുകള് നാളെ ഉച്ചയ്ക്ക് ശേഷം 2 മണിയോടെ ചെന്നൈ ബസന്റ് നഗറിലെ ശ്മശാനത്തില് വച്ച് നടക്കും. സിനിമാ പ്രവര്ത്തകരും സുഹൃത്തുക്കളും ബന്ധുക്കളും സംസ്കാര ചടങ്ങില് പ്രിയ ഗായികയ്ക്ക് വിടനൽകാനെത്തും .
ചെന്നൈ നുങ്കംപാക്കത്തിലെ സ്വവസതിയിലാണ് ഇന്ന് രാവിലെ നിലത്തുവീണു കിടക്കുന്ന നിലയില് വാണി ജയറാമിനെ കണ്ടെത്തിയത് . നെറ്റിയില് മുറിവുണ്ടായിരുന്നു. മുറിയിലെ ടീപ്പോയില് തലയിടിച്ചു വീണതാകാമെന്നാണ് പൊലീസ് നിഗമനം. ആശുപത്രിയില് എത്തിച്ചതിന് ശേഷം മരണം സ്ഥിരീകരിച്ചു. സംഭവത്തിൽ പോലീസ് അന്വേഷണം ആരംഭിച്ചു. പോസ്റ്റ്മോര്ട്ടത്തിനായി സര്ക്കാര് ആശുപത്രിയിലേക്ക് മൃതദേഹം മാറ്റിയിരിക്കുകയാണ്.