ഹൈദരാബാദ്: കാമുകന്റെ മാനസിക പീഡനം മൂലം ആത്മഹത്യയ്ക്ക് ശ്രമിച്ച മെഡിക്കൽ പിജി വിദ്യാർത്ഥിനി മരിച്ചു. തെലങ്കാന വാറങ്കൽ സ്വദേശിനിയായ ഡോ. പ്രീതിയാണ് മരിച്ചത്. തെലങ്കാനയിലെ കകാതിയ മെഡിക്കൽ കോളേജിലെ അനസ്തീഷ്യ വിഭാഗത്തിൽ ഒന്നാം വർഷ പിജി വിദ്യാർത്ഥിനിയായിരുന്നു പ്രീതി. സീനിയർ വിദ്യാർത്ഥിയും കാമുകനുമായ സൈഫ് പ്രീതിയെ മാനസികമായി പീഡിപ്പിച്ചിരുന്നു. ഇതിനെ തുടർന്ന് ബുധനാഴ്ച്ചയാണ് പ്രീതി ആത്മഹത്യക്ക് ശ്രമിച്ചത്. പ്രീതിയുടെ ആത്മഹത്യക്ക് കാരണം ലവ് ജിഹാദ് ആണെന്നാണ് ഉയരുന്ന ആരോപണം. പ്രീതി ആത്മഹത്യ ചെയ്യാൻ ശ്രമിച്ചതിന് പിന്നിൽ ലവ് ജിഹാദ് ആണെന്ന് ബിജെപി സംസ്ഥാനാധ്യക്ഷൻ ബണ്ടി സഞ്ജയും ആരോപിച്ചിരുന്നു.
ഇവർ ആശുപത്രിയിൽ വച്ച് സ്വയം വിഷം കുത്തി വെച്ച് ആത്മഹത്യക്ക് ശ്രമിക്കുകയായിരുന്നു. അതീവ ഗുരുതരാവസ്ഥയിൽ ഹൈദരാബാദിലെ നിംസ് ആശുപത്രിയിൽ പ്രീതി ചികിത്സയിൽ ആയിരുന്നു. സംഭവത്തെ തുടർന്ന് ഡോ. സൈഫിനെ പോലീസ് അറസ്റ്റ് ചെയ്തിരുന്നു. വിഷയത്തിൽ പോലീസ് വിശദമായ അന്വേഷണം തുടരുകയാണ്.
