ദില്ലി: മലയാളി കന്യാസ്ത്രീയെ കോണ്‍വെന്റില്‍ ആത്മഹത്യ ചെയ്ത നിലയില്‍ കണ്ടെത്തി. ജലന്ധര്‍ രൂപതയിലെ സാദിഖ് ഔവര്‍ലേഡി ഒഫ് അസംപ്ഷന്‍ കോണ്‍വെന്റിലെ കന്യാസ്ത്രീയായ അര്‍ത്തുങ്കല്‍ കാക്കിരിയില്‍ ജോണ്‍ ഔസേഫിന്റെ മകള്‍ മേരി മേഴ്സിയെയാണ് ആത്മഹത്യ ചെയ്ത നിലയില്‍ കണ്ടെത്തിയത്.
ചൊവ്വാഴ്ച പുലര്‍ച്ചെയാണ് മൃതദേഹം കണ്ടെത്തിയത്. ചേര്‍ത്തല അര്‍ത്തുങ്കല്‍ സ്വദേശിനി സിസ്റ്റര്‍ മേരി മേഴ്‌സി (30) ആണ് മരിച്ചത്. ജലന്ധര്‍ ബിഷപ് ഹൗസില്‍ നിന്ന് മരണവാര്‍ത്ത എല്ലാ വൈദികര്‍ക്കും കന്യാസ്ത്രീകള്‍ക്കും അയച്ചുവെങ്കിലും മരണകാരണം വ്യക്തമാക്കിയിട്ടില്ല.
അതേസമയം മകള്‍ ആത്മഹത്യ ചെയ്യേണ്ട സാഹചര്യമില്ലെന്നും സഭാ നേതൃത്വത്തിന്റെ നടപടികളില്‍ സംശയമുണ്ടെന്നും കാണിച്ച്‌ പിതാവ് ജോണ്‍ ഔസേഫ് കളക്ടര്‍ക്ക് ഇന്ന് പരാതി നല്‍കി. നാലുവര്‍ഷമായി മകള്‍ ഇതേ കോണ്‍വെന്റില്‍ തന്നെയായിരുന്നു പ്രവര്‍ത്തിച്ചിരുന്നതെന്നും മരിക്കുന്നതിന്റെ തലേന്നും രാത്രി വിളിച്ച്‌ വളരെ സന്തോഷത്തോടെ സംസാരിച്ചെന്നും പരാതിയില്‍ പറയുന്നു.
