മമ്മൂട്ടി തികച്ചും വ്യത്യസ്ത കഥാപാത്രത്തെ അവതരിപ്പിച്ച് പ്രേക്ഷക ശ്രദ്ധയാകര്‍ഷിച്ച ചിത്രമാണ് ‘നൻപകല്‍ നേരത്ത് മയക്കം’. ലിജോ ജോസ് പെല്ലിശ്ശേരി-മമ്മൂട്ടി കൂട്ടുകെട്ടിൽ അതിഗംഭീരമായ വിജയമാണ് ചിത്രത്തിന് ലഭിച്ചത്. ഇക്കഴിഞ്ഞ കേരള രാജ്യാന്തര ചലച്ചിത്രോത്സവത്തില്‍ വലിയ രീതിയില്‍ സ്വീകരിക്കപ്പെട്ട ചിത്രത്തിന് തിയറ്ററുകളിലും വൻ വരവേല്‍പ്പാണ് ലഭിച്ചത്. എന്നാൽ ഇപ്പോഴിതാ ‘നൻപകല്‍ നേരത്ത് മയക്കം’ എന്ന സിനിമ ഒടിടി റിലീസിനൊരുങ്ങുകയാണ്. നെറ്റ്ഫ്ലിക്സാണ് സിനിമ സ്‍ട്രീം ചെയ്യുന്നത്. ഫെബ്രുവരി 23ന് സിനിമ ഒടിടിയിലെത്തും.
മമ്മൂട്ടി കമ്പനിയുടെ ബാനറിൽ ഒരുക്കിയ ആദ്യത്തെ ചിത്രമാണ് ‘നൻപകല്‍ നേരത്ത് മയക്കം’. ദുല്‍ഖറിന്റെ വേഫേറെര്‍ ഫിലിംസ് ആണ് ചിത്രം വിതരണം ചെയ്‍തത്. മമ്മൂട്ടിക്ക് പുറമേ അശോകൻ, രമ്യാ പാണ്ഡ്യൻ, കൈനകരി തങ്കരാജ്, ടി സുരേഷ് ബാബു, ചേതൻ ജയലാല്‍, അശ്വത് അശോക്‍കുമാര്‍, സഞ്‍ജന ദിപു തുടങ്ങിയ നിരവധി താരനിരയാണ് ചിത്രത്തിൽ വേഷമിട്ടിരിക്കുന്നത്.
