തിരുവനന്തപുരം: മാരകമയക്കുമരുന്നായ എം.ഡി.എം.എയുമായി യുവാവ് അറസ്റ്റിൽ. ആലംകോട് വഞ്ചിയൂർ വൈദ്യശാലമുക്കിൽ ചരുവിള വീട്ടിൽ സുധീറിനെയാണ് അറസ്റ്റ് ചെയ്തത്.തിരുവനന്തപുരം റൂറൽ ജില്ല പോലീസ് മേധാവി ശിൽപക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടത്തിയ പരിശോധനയിലാണ് സുധീർ പിടിയിലായത്. 2.46 ഗ്രാം എം.ഡി.എം.എയുമായി നഗരൂർ പോലീസാണ് ഇയാളെ പിടികൂടിയത്.
ആറ്റിങ്ങൽ ഡിവൈ.എസ്.പി ജയകുമാറിന്‍റെ നിർദ്ദേശാനുസരണം ജില്ല പോലീസ് മേധാവിയുടെ ഡി.എ.എൻ.എസ്.എ.എഫ് ടീമും ആറ്റിങ്ങൽ എസ്.എച്ച്.ഒ തൻസീം അബ്ദുൽ സമദ്, നഗരൂർ എസ്.എച്ച്.ഒ അമൃത് സിങ് നായകം, എസ്.ഐമാരായ സജു, അബ്ദുൽ ഹക്കിം, എസ്.സി.പി.ഒ ജിജു, സി.പി.ഒമാരായ ഹരികൃഷ്ണൻ, അസർ, റോഷ്, എബിൻ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കി.
