സെൻ്റ് ഹെലേന ഐലൻഡ് (സൗത്ത് കരോലിന): അമേരിക്കയിൽ വീണ്ടും കൂട്ട വെടിവെപ്പ്. സൗത്ത് കരോലിനയിലെ സെൻ്റ് ഹെലേന ദ്വീപിലുള്ള തിരക്കേറിയ ഒരു ബാറിൽ ഇന്ന് പുലർച്ചെ (പ്രാദേശിക സമയം) ഉണ്ടായ വെടിവെപ്പിൽ നാല് പേർ കൊല്ലപ്പെടുകയും 20-ൽ അധികം പേർക്ക് പരിക്കേൽക്കുകയും ചെയ്തു. പരിക്കേറ്റവരിൽ നാല് പേരുടെ നില ഗുരുതരമാണ്. ബ്യൂഫോർട്ട് കൗണ്ടി ഷെരീഫ് ഓഫീസാണ് ഞെട്ടിക്കുന്ന സംഭവം ഔദ്യോഗികമായി സ്ഥിരീകരിച്ചത്.
സംഭവസമയം ബാറിൽ നൂറുകണക്കിന് ആളുകൾ ഉണ്ടായിരുന്നു. പ്രാദേശിക സമയം പുലർച്ചെ 1 മണിയോടെ സെൻ്റ് ഹെലേന ദ്വീപിലെ പ്രശസ്തമായ ‘വില്ലീസ് ബാർ ആൻഡ് ഗ്രിൽ’ എന്ന സ്ഥാപനത്തിലാണ് വെടിവെപ്പ് നടന്നത്. വെടിവെപ്പിൻ്റെ വിവരമറിഞ്ഞ് പോലീസ് സ്ഥലത്തെത്തുമ്പോൾ വെടിയേറ്റ നിലയിൽ നിരവധി പേരെ കണ്ടെത്തുകയായിരുന്നു.
സംഭവസ്ഥലത്ത് വെച്ച് തന്നെ നാല് പേർ മരിച്ചതായി സ്ഥിരീകരിച്ചു. കുറഞ്ഞത് 20 പേർക്കെങ്കിലും വെടിയേറ്റതായാണ് പ്രാഥമിക വിവരം. പരിക്കേറ്റവരിൽ നാല് പേരെ ഗുരുതരാവസ്ഥയിൽ സമീപത്തെ ആശുപത്രികളിൽ പ്രവേശിപ്പിച്ചു. ആശുപത്രികളിൽ ചികിത്സ തേടിയെത്തുന്നവരുടെ എണ്ണം കൂടാൻ സാധ്യതയുണ്ടെന്നും അധികൃതർ സൂചന നൽകി.
വെടിവെപ്പിന് പിന്നിലെ കാരണം വ്യക്തമല്ല. സംശയമുള്ള ചില വ്യക്തികളെക്കുറിച്ച് അന്വേഷിക്കുന്നുണ്ടെങ്കിലും, ഇതുവരെ ആരെയും അറസ്റ്റ് ചെയ്തിട്ടില്ല. കൊല്ലപ്പെട്ടവരുടെയും പരിക്കേറ്റവരുടെയും വിവരങ്ങൾ അധികൃതർ പുറത്തുവിട്ടിട്ടില്ല. യുഎസ് കോൺഗ്രസ് അംഗം നാൻസി മേസ് ഉൾപ്പെടെയുള്ളവർ സംഭവത്തിൽ ദുഃഖം രേഖപ്പെടുത്തി.. മനോഹരമായ കാഴ്ചകൾക്കും ശാന്തമായ ജീവിതത്തിനും പേരുകേട്ട ഈ തീരദേശ പ്രദേശം ഈ ഞെട്ടിക്കുന്ന സംഭവത്തോടെ ഭീതിയിലായിരിക്കുകയാണ്.
