കൊച്ചി: ചേരാനല്ലൂരിൽ മഞ്ഞളി സ്വദേശി ജയബാലകൃഷ്ണന്റെ മരണത്തിനിടയാക്കിയ വാഹനാപകടത്തിൽ 17-കാരനായ പ്രതിക്ക് ജുവനൈൽ ജസ്റ്റിസ് ബോർഡ് ജാമ്യം അനുവദിച്ച വാർത്ത കേരളീയ സമൂഹത്തിൽ വലിയ ഞെട്ടലുമാണ് അമർഷവുമാണ് ഉണ്ടാക്കിയിരിക്കുന്നത്. അമിതവേഗതയിൽ പാഞ്ഞെത്തിയ ആഡംബര കാർ ഒരു സാധാരണക്കാരന്റെ ജീവനെടുത്തിട്ടും, മണിക്കൂറുകൾക്കകം പ്രതിക്ക് ജാമ്യം ലഭിച്ച നടപടിയെ അതീവ ഗൗരവത്തോടെയും ആശങ്കയോടെയുമാണ് ജനം നോക്കിക്കാണുന്നത്. നിരത്തിലിറങ്ങുന്ന സാധാരണക്കാരുടെ ജീവന് പുല്ലുവിലപോലുമില്ലാത്ത അവസ്ഥയാണോ നമ്മുടെ നാട്ടിലുള്ളതെന്ന ചോദ്യമാണ് ഈ സംഭവം ഓരോ സാധാരണക്കാരന്റെയും ഉള്ളിൽ ഉയർത്തുന്നത്.
പണവും സ്വാധീനവുമുണ്ടെങ്കിൽ റോഡിൽ ആരുടെയും ജീവനെടുത്ത് സുരക്ഷിതരായി പുറത്തിറങ്ങാമെന്ന യാഥാർത്ഥ്യം പൊതുജനങ്ങളിൽ കടുത്ത മാനസിക സംഘർഷവും അരക്ഷിതാവസ്ഥയുമാണ് സൃഷ്ടിച്ചിരിക്കുന്നത്.സ്വന്തം അച്ഛന്റെ വിയോഗത്തിന്റെ ആഘാതത്തിൽനിന്ന് മാറും മുൻപ് മാധ്യമങ്ങൾക്ക് മുന്നിൽ പൊട്ടിക്കരഞ്ഞ ആ മകളുടെ വാക്കുകൾ കേരളത്തിന്റെ മനസ്സാക്ഷിയെ പിടിച്ചുനിർത്തുന്നതായിരുന്നു. “ഒരു സാധാരണക്കാരന് എന്ത് ചെയ്യാൻ പറ്റും എന്ന് കാണിച്ചു തരാം, അച്ഛന് നീതി കിട്ടുന്നവരെ ഈ കുട്ടി പോരാടും” എന്ന് ആ പെൺകുട്ടി പറഞ്ഞതിൽ ഒരു അടിയുറച്ച നിശ്ചയദാർഢ്യത്തിനൊപ്പം തന്നെ നിലവിലുള്ള നിയമവ്യവസ്ഥയോടുള്ള കടുത്ത നിരാശയും പ്രകടമാണ്. ഒരു കുടുംബത്തിന്റെ മുഴുവൻ പ്രതീക്ഷയും തകർന്നടിഞ്ഞിട്ടും കുറ്റവാളിക്ക് സംരക്ഷണം ലഭിക്കുന്നുവെന്ന് തോന്നിപ്പിക്കുന്ന സാഹചര്യങ്ങൾ സാധാരണക്കാരായ മനുഷ്യരെ എത്രത്തോളം മാനസികമായി തളർത്തുന്നു എന്നതിന്റെ നേർക്കാഴ്ചയാണ് ആ കുട്ടിയുടെ കണ്ണീരും രോഷവും.
ഈ അനീതിക്കെതിരെ സമൂഹമാധ്യമങ്ങളിലും നാട്ടുകാർക്കിടയിലും വലിയ രീതിയിലുള്ള പ്രതിഷേധമാണ് അണപൊട്ടിയിരിക്കുന്നത്. പ്രായപൂർത്തിയാകാത്ത കുട്ടിക്ക് ലക്ഷങ്ങൾ വിലമതിക്കുന്ന ആഡംബര കാർ ഓടിക്കാൻ നൽകിയ മാതാപിതാക്കളുടെ ഉത്തരവാദിത്തമില്ലായ്മക്കെതിരെ ശക്തമായ നടപടി വേണമെന്നാണ് ജനങ്ങളുടെ പൊതുവികാരം. ജാമ്യം കിട്ടി പ്രതി പുറത്തിറങ്ങിയെങ്കിലും, ഈ വിഷയത്തിൽ ശക്തമായ നിയമപോരാട്ടവുമായി മുന്നോട്ട് പോകാൻ ജയബാലകൃഷ്ണന്റെ കുടുംബം തീരുമാനിച്ചുകഴിഞ്ഞു. സാധാരണക്കാരുടെ ജീവന് വില കൽപ്പിക്കാത്ത ഇത്തരം പ്രവണതകൾക്കെതിരെ പൊതുസമൂഹവും ഒപ്പമുണ്ടെന്ന പ്രഖ്യാപനമാണ് ഇപ്പോൾ എങ്ങും ഉയരുന്നത്. അമിതവേഗത്തിൽ വാഹനമോടിച്ചതുമായി ബന്ധപ്പെട്ട് ഉയർന്ന പ്രതിഷേധങ്ങൾക്കൊടുവിൽ ജഡ്ജിയെയും കേസിൽ പ്രതി ചേർത്തു. ചേരാനല്ലൂർ ബെൻസ് അപകടത്തിൽ നടപടി സ്വീകരിച്ചതോടെ കേസിൽ നിർണായക വഴിത്തിരിവായി.
