സിനിമയ്‌ക്കകത്തും പുറത്തും ഒരുപോലെ സൗഹൃദം കാത്തുസൂക്ഷിക്കുന്ന താരങ്ങൾ നിരവധിയാണ് സിനിമ ലോകത്തുള്ളത്. അതുപോലെ ഇന്ത്യൻ സിനിമയിൽ നിരവധി വർഷങ്ങളായി സൂപ്പർ സ്റ്റാറായി വാഴുന്ന രണ്ട് മഹാനടന്മാരായ മമ്മുട്ടിയും മോഹൻലാലും യാതൊരു കോട്ടവും സംഭവിക്കാതെ ഇന്നും തങ്ങളുടെ സൗഹൃദം കാത്തുസൂക്ഷിക്കുകയാണ്. മറ്റ് സിനിമ ലോകത്തുള്ളവർക്ക് പോലും അസൂയ ജനിപ്പിക്കുന്ന കൂട്ടുകാരാണ് ഇരുവരും.
ഇന്ന് മലയാള സിനിമയുടെ മെഗാസ്റ്റാർ മമ്മുട്ടിയുടെ പിറന്നാൾ ദിനത്തോടനുബന്ധിച്ച് ആരാധകരും സുഹൃത്തുക്കളും സഹപ്രവര്‍ത്തകരും ഉള്‍പ്പടെ നിരവധിപേരാണ് പ്രിയപ്പെട്ട നടന് സോഷ്യല്‍ മീഡിയയിലൂടെ ജന്മദിനാശംസകള്‍ നല്‍കുന്നത്. ഒപ്പം കൂട്ടുകാരനായ മോഹന്‍ലാലും മമ്മൂട്ടിക്ക് ആശംസകളുമായി എത്തിയിരിക്കുകയാണ്. സോഷ്യല്‍ മീഡിയയില്‍ ഒരു വീഡിയോ പങ്കുവച്ചുകൊണ്ടാണ് മോഹന്‍ലാല്‍ പ്രിയപ്പെട്ട ഇച്ചാക്കാക്ക് ആശംസ നേര്‍ന്നിരിക്കുന്നത്.
മോഹൻലാലിൻറെ വാക്കുകളിലേക്ക്….“സഹോദര നിർവിശേഷമായ വാത്സല്യങ്ങൾ കൊണ്ട് ജേഷ്ഠമായ കരുതൽ കൊണ്ട് ജീവിതത്തിലെ ഉയര്‍ച്ച താഴ്ചകളിലേയും സന്തോഷത്തിലും താങ്ങായി ഒപ്പം നില്‍ക്കുന്ന സാന്നിധ്യമാണ് മമ്മൂക്ക. അദ്ദേഹത്തിന്റെ ജന്മനാൾ താനും കുടുംബവും ഒപ്പം ആഘോഷിക്കുന്നു. അദ്ദേഹത്തിന്റെ പേരിനൊപ്പം തന്റെ പേരും പറയുന്നത് സന്തോഷമാണെന്നും മോഹൻലാൽ പറയുന്നു. അതേസമയം 53 സിനിമകളില്‍ തങ്ങൾക്ക് ഒരുമിച്ച്‌ അഭിനയിക്കാന്‍ സാധിച്ചു. ഒന്നിച്ച്‌ അഞ്ച് സിനിമകള്‍ നിര്‍മ്മിച്ചു. ഈ കൂട്ടുകെട്ട് വിസ്മയമാണ്. ചെയ്യാന്‍ ഇരിക്കുന്ന സിനിമകള്‍ ചെയ്തതിനേക്കാള്‍ മനോഹരം എന്നാണ് താൻ കരുതുന്നതെന്നും, ഇച്ചാകാക്ക് നല്ല സിനിമകള്‍ ലഭിക്കട്ടെ എന്നും, തങ്ങൾക്ക് ഇനിയും ഒരുമിച്ച്‌ അഭിനയിക്കാന്‍ കഴിയട്ടെ എന്നും പ്രാര്‍ത്ഥിക്കുന്നു” എന്നാണ് അദ്ദേഹം വീഡിയോയിലൂടെ പറഞ്ഞത്. മോഹന്‍ലാലിന് പുറമെ മലയാളത്തിലെ നിരവധി താരങ്ങള്‍ പ്രിയപ്പെട്ട നടന് സോഷ്യല്‍ മീഡിയയിലൂടെ ആശംസകള്‍ നേര്‍ന്നിട്ടുണ്ട്.
