ദില്ലി: രാജ്യത്തെ മുഖ്യമന്ത്രിമാരുടെ പ്രകടനം വിലയിരുത്തുന്ന ഏറ്റവും ഒടുവിലത്തെ സർവേയിൽ ഫോട്ടോ ഫിനിഷ്. കഴിഞ്ഞ കുറച്ചു നാളുകളായി ഒന്നാം സ്ഥാനത്ത് ഉത്തർ പ്രദേശ് മുഖ്യമന്ത്രി യോഗി ആദിത്യനാഥ് ആയിരുന്നു, സർവ്വേ പ്രകാരം 52.7 ശതമാനം റേറ്റിംഗോടെ ഒഡീഷ മുഖ്യമന്ത്രി നവീൻ പട്നായിക്കാണ് ഒന്നാം സ്ഥാനത്ത്. 51.3 ശതമാനം റേറ്റിംഗോടെ യോഗി ആദിത്യനാഥ് രണ്ടാം സ്ഥാനത്തെത്തി. എന്നാൽ ആദ്യ അഞ്ച് സ്ഥാനങ്ങളിൽ നാലിലും ബിജെപി മുഖ്യമന്ത്രിമാരാണ്.
48.6 ശതമാനം റേറ്റിംഗ് കരസ്ഥമാക്കി വടക്കു കിഴക്കൻ സംസ്ഥാനങ്ങളിലെ സ്റ്റാർ മുഖ്യമന്ത്രി ഹിമന്ത ബിശ്വ ശർമ്മ മൂന്നാം സ്ഥാനത്തെത്തി. ഗുജറാത്ത് മുഖ്യമന്ത്രി ഭുപേന്ദ്ര പട്ടേലും ത്രിപുര മുഖ്യമന്ത്രി മണിക് സാഹയുമാണ് യഥാക്രമം 42.6 ശതമാനം, 41.4ശതമാനം റേറ്റിംഗ് കരസ്ഥമാക്കൂ നാലും അഞ്ചും സ്ഥാനങ്ങൾ നേടിയത്. കഴിഞ്ഞ 22 വർഷമായി ഒഡീഷയുടെ മുഖ്യമന്ത്രിയാണ് ബിജു ജനതാ ദൾ പാർട്ടിയുടെ സ്ഥാപകനായ നവീൻ പട്നായിക്. ഉത്തർ പ്രദേശിന്റെ ചരിത്രത്തിൽ ആദ്യമായി തുടർഭരണം നേടിയ മുഖ്യമന്ത്രിയാണ് യോഗി ആദിത്യനാഥ്.
