ദില്ലി: കൊറോണ വൈറസിന്റെ പുതിയ ഭാവമാറ്റം ആശങ്ക സൃഷ്ടിക്കുന്ന പശ്ചാത്തലത്തില്‍ കരുതല്‍ നടപടികളുമായി ഇന്ത്യ. അതിവേഗം വൈറസ് രോഗം പകരുന്ന യു.കെയിലേക്കുള‌ള വ്യോമയാന ഗതാഗതത്തിന് തല്‍ക്കാലം വിലക്കേര്‍പ്പെടുത്തി ഇന്ത്യ. ഈ വര്‍ഷം അവസാനം വരെയാണ് വിലക്ക്. ട്രാന്‍സി‌റ്റ് വിമാനങ്ങള്‍ക്കും വിലക്കുണ്ട്. നാളെ അര്‍ദ്ധരാത്രി മുതല്‍ നിരോധനം പ്രാബല്യത്തില്‍ വരും.നിരോധനം പ്രാബല്യത്തില്‍ വരുന്നതിന് മുന്‍പ് യുകെയില്‍ നിന്നും ഇന്ത്യയില്‍ എത്തുന്ന യാത്രക്കാര്‍ക്ക് കൊവിഡ് പരിശോധന കര്‍ശനമാക്കിയിട്ടുണ്ട്.
അതേസമയം കൊറോണ വൈറസിന്റെ പുതിയ രൂപാന്തരത്തെക്കുറിച്ച്‌ നിലവില്‍ ആശങ്കപ്പെടേണ്ട സാഹചര്യം രാജ്യത്തില്ലെന്നും കരുതല്‍ നടപടി എന്ന നിലക്കാണ് വിമാനങ്ങള്‍ക്ക് വിലക്കേര്‍പ്പെടുത്തിയിരിക്കുന്നതെന്നും കേന്ദ്ര സര്‍ക്കാര്‍ വ്യക്തമാക്കി.
അതേസമയം അതിവേഗം പടരുന്ന പുതിയ കൊറോണ വൈറസ് ലണ്ടനെ തികച്ചും ഒറ്റപ്പെടുത്തുകയാണ്. നിയന്ത്രിക്കാന്‍ ബുദ്ധിമുട്ടുള്ളതെന്ന് കരുതപ്പെടുന്ന പുതിയ ഇനം വൈറസിനെ കണ്ടെത്തിയെന്ന വാര്‍ത്ത പരന്നതോടെ മിക്ക രാജ്യങ്ങളും ലണ്ടനിലേക്കുള്ള യാത്രാനിയന്ത്രണങ്ങളുമായി എത്തിക്കഴിഞ്ഞു. പല രാജ്യങ്ങളും ബ്രിട്ടനിലേക്കുള്ള വിമാന സര്‍വ്വീസുകള്‍ തന്നെ ഒഴിവാക്കികഴിഞ്ഞു. ചരക്കു ഗതാഗതം കൂടി താറുമാറായതോടെ ബ്രിട്ടനില്‍ പല വസ്തുക്കള്‍ക്കും ക്ഷാമമുണ്ടാകുവാനുള്ള സാധ്യതയും വര്‍ദ്ധിച്ചു. നേരത്തേയുള്ളതിനേക്കാള്‍ മാരക വ്യാപനശേഷിയാണ് ജനിതക മാറ്റത്തിലൂടെ വൈറസിന് സംഭവിച്ചത്. 70 ശതമാനത്തിലേറെയാണ് വ്യാപനശേഷി. അതേസമയം വ്യാപന ശേഷി കൂടുന്നതിനനുസരിച്ച്‌ മരണ നിരക്ക് കൂടുന്നോ എന്ന കാര്യത്തില്‍ വ്യക്തതയില്ല. മരണ നിരക്കില്‍ മാറ്റമില്ലെന്നാണ് ബ്രിട്ടന്‍ അറിയിക്കുന്നത്. നിലവിലെ വാക്‌സിനുകള്‍ ജനിതക മാറ്റം സംഭവിച്ച വൈറസിനെ പ്രതിരോധിക്കുമോ എന്ന കാര്യത്തില്‍ ആശങ്കയുണ്ട്. എന്നാല്‍ ഇപ്പോഴത്തെ സാഹചര്യത്തില്‍ ആശങ്കപ്പെടേണ്ട സാഹചര്യമില്ലെന്നാണ് റിപ്പോര്‍ട്ടുകള്‍. വരും ദിവസങ്ങളിലെ ഇതു സംബന്ധിച്ച്‌ കൂടുതല്‍ വിവരങ്ങള്‍ ലഭ്യമാവൂ. ഞായറാഴ്ച മാത്രം 13000 പേര്‍ക്കാണ് പുതിയ തരം കൊറോണ വൈറസ് ബാധ സ്ഥിരീകരിച്ചത്. ലണ്ടന്‍ മേഖലയിലും തെക്ക് കിഴക്കന്‍ ഇംഗ്ലണ്ടിലുമാണ് രോഗവ്യാപനം നടന്നിരിക്കുന്നത്.
