കോഴിക്കോട്: സംസ്ഥാനത്ത് നിപ വൈറസ് ബാധിച്ച് മരിച്ച 12 വയസുകാരന്റെ സമ്പര്ക്കപ്പട്ടികയിലുള്ള 17 പേരുടെ പരിശോധനാ ഫലം കൂടി നെഗറ്റീവായതായി ആരോഗ്യമന്ത്രി. ഇതിലെ അഞ്ചെണ്ണം എന്.ഐ.വി. പൂനെയിലും മറ്റുള്ളവ കോഴിക്കോട് മെഡിക്കല് കോളേജില് പ്രത്യേകമായി സജ്ജമാക്കിയ ലാബിലുമാണ് പരിശോധിച്ചത്. ഇതോടു കൂടി 140 പേരുടെ സാമ്പിളുകളാണ് നെഗറ്റീവായതെന്നും മന്ത്രി പറഞ്ഞു.
അതേസമയം കഴിഞ്ഞ ദിവസം ചാത്തമംഗലത്ത് നിന്നും ശേഖരിച്ച് പരിശോധനയ്ക്ക് അയച്ച മൃഗങ്ങളുടെ ആദ്യഘട്ട സാമ്പിള് പരിശോധനയും നെഗറ്റീവായിരുന്നു. നിപ വൈറസ് ബാധയുടെ ഉറവിടം കണ്ടെത്താനായി മൃഗസംരക്ഷണ വകുപ്പും കേന്ദ്ര സംഘവും പ്രദേശത്ത് നിന്ന് ആടുകളുടേയും വവ്വാലുകളുടേയും സാമ്പിളുകള് ശേഖരിച്ചാണ് പരിശോധനയ്ക്കായി അയച്ചത്. എന്നാൽ സ്ഥിതിഗതികള് നിയന്ത്രണ വിധേയമാണെങ്കിലും ഏര്പ്പെടുത്തിയിട്ടുള്ള നിയന്ത്രണങ്ങളില് ഇളവുകള് നല്കിയിട്ടില്ല.
