തിരുവനന്തപുരം: അടുത്ത മൂന്ന് മണിക്കൂറിൽ സംസ്ഥാനത്തെ ഒറ്റപ്പെട്ടയിടങ്ങളിൽ ഇന്നും മഴയ്ക്ക് (Heavy Rain In Kerala) സാധ്യതയെന്ന് മുന്നറിയിപ്പ്. മഴ ലഭിക്കുമെങ്കിലും ജില്ലകളിൽ മഴ മുന്നറിയിപ്പില്ല. അതേസമയം ബുധനാഴ്ച മുതൽ വീണ്ടും മഴ കനക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.വടക്കൻ കേരളത്തിലും മധ്യകേരളത്തിലുമാകും മഴ കൂടുതലായി ലഭിക്കുക. മഴ മുന്നറിയിപ്പ് ഇല്ലെങ്കിലും ജനങ്ങൾ ജാഗ്രത പാലിക്കണമെന്ന് ദുരന്ത നിവാരണ അതോറിറ്റി അറിയിച്ചു.
പമ്പ ഡാം തുറന്നു
പമ്പ, ഇടമലയാര് ഡാമുകള് തുറന്നു (Pamba Dams). രാവിലെ അഞ്ചുമണിയോടെയാണ് പമ്പ ഡാമിന്റെ രണ്ട് ഷട്ടറുകള് 30 സെന്റിമീറ്റര് വീതം തുറന്നത്. പുറത്തേക്ക് ഒഴുക്കുന്ന ജലം ആറുമണിക്കൂര് കൊണ്ട് പമ്പ ത്രിവേണിയില് എത്തും. പമ്പയില് ജലവനിരപ്പ് ഉയാരാന് സാധ്യതയുള്ളതിനാല് ശബരിമലയില് മറ്റന്നാള് വരെ ഭക്തര്ക്ക് ദര്ശനാനുമതിയില്ല. ഇടമലയാര് ഡാമിന്റെ രണ്ട് ഷട്ടറുകള് 80 സെന്റിമീറ്റര് വീതമാണ് ഇന്ന് തുറന്നത്. ആലുവ, പറവൂര് മേഖലകളെയാണ് ഏറ്റവുമധികം ബാധിക്കുക.
എന്നാല് നിലവില് ആശങ്കപ്പെടേണ്ട സാഹചര്യമില്ല. എട്ടുമണിയോടെ ഇടമലയാര് ഡാമില് നിന്നുള്ള വെള്ളം ഭൂതത്താന്കെട്ടിലെത്തും.25 ഘന അടി മുതല് പരമാവധി 50 ഘന അടി വരെ വെള്ളമാണ് പമ്പ ഡാമില് നിന്ന് പുറത്തേക്കൊഴുക്കുന്നത്. രണ്ട് ഷട്ടറുകള് ക്രമാനുഗതമായി ഉയര്ത്തുകയായിരുന്നു. കക്കി– ആനത്തോട് ഡാമിനെ അപേക്ഷിച്ച് പുറത്തേക്ക് ഒഴുക്കിവിടുന്ന ഈ വെള്ളത്തിന്റെ അളവ് വളരെ കുറവാണ്. കക്കി-ആനത്തോട് ഡാം തുറന്നുവിട്ടപ്പോള് പമ്പയിലെ ജലനിരപ്പ് 10-15 സെന്റിമീറ്റര് മാത്രമാണ് ഉയര്ന്നത്. പമ്പ ഡാമിലെ വെള്ളമെത്തുമ്പോള് ജലനിരപ്പ് 20-25 സെന്റിമീറ്റര് വരെ ഉയരാനാണ് സാധ്യത
അതേസമയം ബുധൻ, വ്യാഴം, വെള്ളി ദിവസങ്ങളിലാണ് സംസ്ഥാനത്ത് മഴ ശക്തമാകുക. കനത്ത മഴ ലഭിക്കുന്ന സാഹചര്യത്തിൽ ബുധനാഴ്ച ആലപ്പുഴ, കണ്ണൂർ, കാസർകോട് എന്നീ ജില്ലകൾ ഒഴികെ ബാക്കിയെല്ലാ ജില്ലകളിലും യെല്ലോ അലർട്ട് ഏർപ്പെടുത്തിയിട്ടുണ്ട്. വ്യാഴാഴ്ച 12 ജില്ലകളിലാണ് മഴ മുന്നറിയിപ്പുള്ളത്. വെള്ളിയാഴ്ച കാസർഗോഡ് ഒഴിയെ ബാക്കിയെല്ലാ ജില്ലകളിലും യെല്ലോ അലർട്ട് ആണ്. മഴയ്ക്ക് പുറമേ ശക്തമായ കാറ്റിനും ഇടിമിന്നലിനും സാധ്യതയുണ്ട്.
