പാലക്കാട്:പട്ടാമ്പിയിൽ വളർത്തു നായയുടെ കണ്ണുകൾ ചൂഴ്ന്നെടുത്ത സംഭവത്തിൽ പ്രതികളെ കുറിച്ച് സൂചന ലഭിച്ചതായി പോലീസ്.അന്വേഷണം ഊർജിതമാക്കിയിട്ടുണ്ട്.പ്രതികളെ ഉടൻ പിടിക്കുമെന്നു പോലീസ് അറിയിച്ചു.
പാലക്കാട് പട്ടാമ്പിക്ക് അടുത്ത് മുതുതലയിൽ ചിത്രകാരി ദുർഗാ മാലതിയുടെ വളർത്തു നായ നക്കുവിന് നേരെയാണ് ഈ ക്രൂരതയുണ്ടായത്. ഒരാഴ്ച മുമ്പാണ് നായയെ വീട്ടിൽ നിന്ന് കാണാതായത്. വീടിനു മുന്നിൽ കെട്ടിയിട്ട നായയെ രാത്രി 12 മണിക്ക് കാണാതാവുകയായിരുന്നു.വെള്ളിയാഴ്ച വീട്ടിൽ തിരിച്ചെത്തിയ നായയുടെ രണ്ടു കണ്ണുകളും ചൂഴ്ന്നെടുത്ത നിലയിൽ ആയിരുന്നു. നായയുടെ ദേഹത്ത് മറ്റ് മുറിവുകളില്ല. കണ്ണ് ആരെങ്കിലും കുത്തിപ്പൊട്ടിച്ചതായിരിക്കാമെന്നാണ് നിഗമനം. കേസിൽ നിരവധി പേരെ ചോദ്യം ചെയ്തു. ഉടമയോട് ആർക്കെങ്കിലും വ്യക്തിവിരോധം ഉണ്ടോയെന്നും പരിശോധിക്കുന്നുണ്ട്.
കേസിൽ ഒന്നിലേറെ പേരുണ്ടാകാമെന്നാണ് നിഗമനം. സംശയമുള്ള ഒരു സംഘം പോലീസിൻ്റെ നിരീക്ഷണത്തിലാണ്. നായയെ തൃശൂർ വെറ്റിനറി ആശുപത്രിയിൽ ശസ്ത്രക്രിയയ്ക്ക് വിധേയനാക്കി. രണ്ടു കണ്ണുകളുടെയും കൃഷ്ണമണികൾ നഷ്ടപ്പെട്ടതിനാൽ കണ്ണിൻ്റെ ഭാഗം പൂർണമായി തുന്നിക്കെട്ടി സംരക്ഷിക്കാനാണ് വീട്ടുകാരുടെ തീരുമാനം.
