സിഡ്നി: മൂന്ന് ദിവസത്തെ സന്ദർശനത്തിനായി ഓസ്ട്രേലിയയിലെത്തിയ പ്രധാനമന്ത്രി നരേന്ദ്ര മോദി രാജ്യത്തെ ക്ഷേത്രങ്ങൾക്കെതിരായ ആക്രമണങ്ങളെക്കുറിച്ച് ആശങ്ക പ്രകടിപ്പിച്ചു. എന്നാൽ ഇത്തരത്തിൽ ക്ഷേത്രങ്ങൾക്ക് നേരെ നടക്കുന്ന ആക്രമണങ്ങളിൽ കർശനമായ നടപടി സ്വീകരിക്കുമെന്ന് ഓസ്ട്രേലിയൻ പ്രധാനമന്ത്രി ആന്റണി ആൽബനീസ് നരേന്ദ്രമോദിക്ക് ഉറപ്പ് നൽകി. ഓസ്ട്രേലിയയിലെ ക്ഷേത്രങ്ങൾക്ക് നേരെയുള്ള ആക്രമണത്തെക്കുറിച്ചും വിഘടനവാദികളുടെ പ്രവർത്തനങ്ങളെക്കുറിച്ചും പ്രധാനമന്ത്രി ആന്റണി അല്ബാനീസും പ്രധാനമന്ത്രി നരേന്ദ്രമോദിയും നേരത്തെതന്നെ ചർച്ചകൾ നടത്തിയിരുന്നു.
അതേസമയം ഇന്ത്യയിൽ നടക്കുന്ന ക്രിക്കറ്റ് ലോകകപ്പും ദീപാവലി ആഘോഷങ്ങളും കാണാൻ ഓസ്ട്രേലിയൻ പ്രധാനമന്ത്രി ആന്റണി അൽബാനീസിനേയും ഓസ്ട്രേലിയൻ ആരാധകരേയും നരേന്ദ്രമോദി ഇന്ത്യയിലേക്ക് ക്ഷണിച്ചു.സിഡ്‌നിയിൽ നടന്ന ഉഭയകക്ഷി ചർച്ചയ്ക്ക് ശേഷം പ്രധാനമന്ത്രി അൽബാനീസുമായി നടത്തിയ സംയുക്ത പത്രസമ്മേളനത്തിലാണ് ഇക്കാര്യം പറഞ്ഞത്. ഇന്ത്യ-ഓസ്‌ട്രേലിയ ബന്ധം “ടി20 മോഡിലേക്ക്” പ്രവേശിച്ചുവെന്ന് പ്രധാനമന്ത്രി നരേന്ദ്ര മോദി പറഞ്ഞു.
