തെരഞ്ഞെടുപ്പ് കാലത്ത് നൽകിയ പ്രധാന വാഗ്ദാനങ്ങൾ ലംഘിച്ച് കോൺഗ്രസ് സർക്കാർ കേരളത്തിലെ യുവജനങ്ങളെ വഞ്ചിച്ചതായി യുവമോർച്ച സംസ്ഥാന ജനറൽ സെക്രട്ടറി വി. മനുപ്രസാദ്. ആയിരക്കണക്കിന് യുവാക്കൾക്ക് സ്വന്തമായി സംരംഭങ്ങൾ ആരംഭിക്കാനും സ്വയം തൊഴിൽ കണ്ടെത്താനും സഹായിക്കുമെന്ന് കോൺഗ്രസ് അവകാശപ്പെട്ട അഞ്ച് ലക്ഷം രൂപ വരെയുള്ള യുവജന വായ്പാ പദ്ധതിയെക്കുറിച്ച് വി.ഡി സതീശൻ സർക്കാർ അധികാരത്തിലെത്തിയ ശേഷം അവതരിപ്പിച്ച ആദ്യ ബജറ്റിൽ യാതൊരു പരാമർശവുമില്ലെന്ന് അദ്ദേഹം ചൂണ്ടിക്കാട്ടി. തെരഞ്ഞെടുപ്പ് വിജയത്തിനായി ഗ്യാരന്റികൾ പ്രഖ്യാപിക്കുകയും പിന്നീട് അത് അപ്പാടെ മറക്കുകയും ചെയ്യുന്ന പഴയ കോൺഗ്രസ് രാഷ്ട്രീയ ശൈലിയാണ് ഇവിടെയും ആവർത്തിച്ചിരിക്കുന്നത്.
കേരളത്തിലെ യുവാക്കൾ ചരിത്രത്തിലെ ഏറ്റവും വലിയ തൊഴിലില്ലായ്മ പ്രതിസന്ധിയിലൂടെയാണ് കടന്നുപോകുന്നത്. പഠനം പൂർത്തിയാക്കിയ ലക്ഷക്കണക്കിന് യുവതീ-യുവാക്കൾ തൊഴിൽ തേടി സംസ്ഥാനത്തിന് പുറത്തേക്കും വിദേശത്തേക്കും കുടിയേറാൻ നിർബന്ധിതരാകുകയാണ്. നാട്ടിൽ തന്നെ സംരംഭം തുടങ്ങാൻ ആഗ്രഹിക്കുന്നവരാകട്ടെ, സാമ്പത്തിക പ്രതിസന്ധിയും ബാങ്കുകളുടെ കർശന നിബന്ധനകളും കാരണം വലിയ ബുദ്ധിമുട്ടുകൾ നേരിടുന്നു. ഇത്തരമൊരു നിർണായക സാഹചര്യത്തിലാണ് യുവാക്കൾക്ക് ഏറെ പ്രതീക്ഷ നൽകിയ പ്രധാന വാഗ്ദാനം ബജറ്റിൽ കോൺഗ്രസ് സർക്കാർ പൂർണ്ണമായും വിസ്മരിച്ചിരിക്കുന്നത്.
കേരളത്തിന്റെ ഭാവിയെക്കുറിച്ചുള്ള വ്യക്തമായ കാഴ്ചപ്പാടോ യുവജനങ്ങൾക്ക് തൊഴിൽ സൃഷ്ടിക്കാനുള്ള സമഗ്രമായ പദ്ധതികളോ പുതിയ ബജറ്റിൽ ഇല്ല. യുവാക്കളുടെ യഥാർത്ഥ ആവശ്യങ്ങൾക്ക് മറുപടി നൽകുന്നതിന് പകരം, സംസ്ഥാനത്തിന്റെ കടവും ധൂർത്തും വർധിപ്പിക്കുന്ന പ്രഖ്യാപനങ്ങളാണ് ബജറ്റിലുടനീളം നിറഞ്ഞുനിൽക്കുന്നത്. യുവജനങ്ങളെ പൂർണ്ണമായും വഞ്ചിച്ച ഈ ജനവിരുദ്ധ നിലപാടിനെതിരെ യുവമോർച്ച ശക്തമായ സമരപരിപാടികളുമായി മുന്നോട്ട് പോകുമെന്നും, യുവാക്കൾക്ക് നൽകിയ ഓരോ വാഗ്ദാനവും നടപ്പാക്കാൻ സർക്കാർ തയ്യാറാകുന്നതുവരെ പോരാട്ടം തുടരുമെന്നും വി. മനുപ്രസാദ് പ്രസ്താവനയിൽ വ്യക്തമാക്കി.
