ഫാൽത്ത : ബംഗാൾ രാഷ്ട്രീയത്തിൽ ‘പുഷ്പ’ എന്ന് സ്വയം വിശേഷിപ്പിച്ച് വാർത്തകളിൽ നിറഞ്ഞ തൃണമൂൽ കോൺഗ്രസ് നേതാവ് ജഹാം ഗീർ ഖാന് പോലീസിന്റെ വക പരസ്യമായ അപമാനം. അമിത പിരിവ് ഉൾപ്പെടെയുള്ള വിവിധ ക്രിമിനൽ കേസുകളിൽ അറസ്റ്റിലായ ഇയാളെ ഫാൽത്തയിലെ സഹാറർഹട്ട് റോഡിലൂടെ വെറും അര ട്രൗസർ മാത്രം ധരിപ്പിച്ച് പോലീസ് നടത്തിച്ചു. ഇതിന്റെ വീഡിയോ ദൃശ്യങ്ങൾ ഇപ്പോൾ സാമൂഹ മാദ്ധ്യമങ്ങളിൽ കാട്ടുതീ പോലെ പടരുകയാണ്.
കഴിഞ്ഞ തിങ്കളാഴ്ച ഇൻഡോ-നേപ്പാൾ അതിർത്തിയിലെ പാനിടാങ്കിയിൽ വെച്ചാണ് ബംഗാൾ സ്പെഷ്യൽ ടാസ്ക് ഫോഴ്സ് ജഹാംഗീർ ഖാനെ പിടികൂടിയത്. ഒളിവിൽ പോയ ഇദ്ദേഹം നേപ്പാളിലേക്ക് കടക്കാൻ ശ്രമിക്കുന്നതിനിടെയാണ് രഹസ്യ വിവരത്തിന്റെ അടിസ്ഥാനത്തിൽ പോലീസ് വലയിലായത്. നിയമസഭാ തിരഞ്ഞെടുപ്പ് ഫലം പുറത്തുവന്ന മെയ് 4-ന് ശേഷം ഇയാൾക്കെതിരെ നിരവധി ക്രിമിനൽ കേസുകൾ രജിസ്റ്റർ ചെയ്യപ്പെട്ടിരുന്നു. കൊൽക്കത്ത ഹൈക്കോടതി ഇടക്കാല സംരക്ഷണം നിഷേധിച്ചതോടെയാണ് ഖാൻ ഒളിവിൽ പോയത്.
തിരഞ്ഞെടുപ്പ് പ്രചാരണ വേളയിൽ സ്വയം ‘പുഷ്പ’ എന്ന് വിളിച്ചുകൊണ്ടായിരുന്നു ജഹാംഗീർ ഖാൻ ശ്രദ്ധേയനായത്. തിരഞ്ഞെടുപ്പ് കമ്മീഷൻ നിരീക്ഷകനായി നിയമിച്ച ‘എൻകൗണ്ടർ സ്പെഷ്യലിസ്റ്റ്’ ഐപിഎസ് ഓഫീസർ അജയ് പാൽ ശർമ്മയെ സിനിമയിലെ സിങ്കം എന്ന കഥാപാത്രത്തോടാണ് അന്ന് ജനങ്ങൾ ഉപമിച്ചിരുന്നത്. ഇതിനെ പരിഹസിച്ചുകൊണ്ട്, ശർമ്മ സിങ്കമാണെങ്കിൽ താൻ പുഷ്പയാണെന്നും ആർക്കും മുന്നിലും കുനിയുകയില്ലെന്നും ഖാൻ പ്രഖ്യാപിച്ചിരുന്നു. എന്നാൽ ഇപ്പോൾ വെള്ള ടി-ഷർട്ടും അര ട്രൗസറും ധരിച്ച്, പോലീസുകാരുടെ അകമ്പടിയോടെ തലതാഴ്ത്തി നടന്നുപോകുന്ന ഖാന്റെ ദൃശ്യങ്ങൾ മുൻപത്തെ അവകാശവാദങ്ങളുമായി വലിയ വൈരുദ്ധ്യമാണ് പുലർത്തുന്നത്.
തൃണമൂൽ കോൺഗ്രസിന്റെ ഫാൽത്ത മണ്ഡലത്തിലെ സ്ഥാനാർത്ഥിയായിരുന്നു ഖാൻ. എന്നാൽ വ്യാപകമായ ക്രമക്കേടുകൾ റിപ്പോർട്ട് ചെയ്തതിനെ തുടർന്ന് തിരഞ്ഞെടുപ്പ് കമ്മീഷൻ ഇവിടെ റീ-പോളിംഗ് പ്രഖ്യാപിച്ചിരുന്നു. പിന്നീട് റീ-പോളിംഗിൽ നിന്ന് പിന്മാറിയ ഖാൻ പൊതുവേദികളിൽ നിന്ന് അപ്രത്യക്ഷനാവുകയായിരുന്നു. ജഹാംഗീർ ഖാന്റെ ഈ പതനത്തെ പരിഹസിച്ചുകൊണ്ട് ബി.ജെ.പി എം.പി സൗമിത്ര ഖാൻ ഉൾപ്പെടെയുള്ളവർ രംഗത്തെത്തിയിട്ടുണ്ട്.
