ഇടുക്കി : നെടുങ്കണ്ടത്ത് നാടിനെ നടുക്കിയ ഇരട്ടക്കൊലപാതകത്തിന്റെ കൂടുതൽ വിവരങ്ങൾ പുറത്ത്. സ്വന്തം അമ്മ മേരിക്കുട്ടിയെയും സഹോദരൻ റെജിയെയും അതിക്രൂരമായി കൊലപ്പെടുത്തിയ ശേഷം പ്രതി സജി യാതൊരു കുറ്റബോധവുമില്ലാതെ നാട്ടിൽ സ്വതന്ത്രനായി വിഹരിക്കുകയായിരുന്നുവെന്ന വെളിപ്പെടുത്തൽ ഉദ്യോഗസ്ഥരെ പോലും അമ്പരപ്പിച്ചിരിക്കുകയാണ്. ഏപ്രിൽ നാലിന് നടന്ന കൊലപാതകത്തിന് ശേഷം ഇരുപത്തിയഞ്ച് ദിവസത്തോളം ഇയാൾ സാധാരണക്കാരനെപ്പോലെയാണ് നാട്ടിൽ കഴിഞ്ഞത്.
സഹോദരൻ റെജിയുമായുണ്ടായ ചെറിയ തർക്കമാണ് ഒടുവിൽ ഇരട്ടക്കൊലപാതകത്തിൽ കലാശിച്ചത്. ഏപ്രിൽ നാലിന് രാത്രി മദ്യപിച്ചെത്തിയ റെജി ടിവി ഓഫ് ചെയ്യുകയും പാത്രം നിലത്തടിക്കുകയും ചെയ്തതോടെ സജി പ്രകോപിതനായി. മർദ്ദനമേറ്റ് അവശനായ റെജിയെ കസേരയിലിരുത്തി തോർത്ത് ഉപയോഗിച്ച് കഴുത്തുഞെരിച്ചാണ് സജി കൊലപ്പെടുത്തിയത്. ഈ ദൃശ്യങ്ങൾ കണ്ട് തടയാൻ ഓടിയെത്തിയ അമ്മ മേരിക്കുട്ടിയെ സജി ക്രൂരമായി മർദ്ദിക്കുകയും, ബോധരഹിതയായി വീണ അമ്മയുടെ തല ഭിത്തിയിലിടിച്ച് മരണം ഉറപ്പാക്കുകയുമായിരുന്നു.
കൃത്യത്തിന് ശേഷം രണ്ട് ദിവസത്തോളം മൃതദേഹങ്ങൾ വീട്ടിൽ തന്നെ സൂക്ഷിച്ച പ്രതി, പിന്നീട് ഇവ വിറകുപുരയിലെ വിടവിൽ പച്ച നെറ്റും തുണിയും ഉപയോഗിച്ച് ഒളിപ്പിച്ചു. മൃഗങ്ങൾ മൃതദേഹം കടിച്ചുകൊണ്ടുപോകുന്നത് ഒഴിവാക്കാൻ ഇതിനു മുകളിൽ ഭാരമുള്ള വസ്തുക്കൾ വെക്കുകയും ചെയ്തു. സംഭവത്തിന്റെ മൂന്നാം ദിവസം അർദ്ധരാത്രിയോടെ ഏലത്തോട്ടത്തിന് സമീപം കുഴിയെടുത്ത് മൃതദേഹങ്ങൾ കുഴിച്ചുമൂടി. മൃതദേഹങ്ങൾ വേഗത്തിൽ അഴുകുന്നതിനായി കുമ്മായം ഉപയോഗിച്ചതായും സജി പോലീസിനോട് കുറ്റസമ്മതം നടത്തിയിട്ടുണ്ട്.
കൊലപാതകത്തിന് ശേഷം ഇരുപത്തിയഞ്ച് ദിവസത്തോളം സജി നാട്ടിൽ സജീവമായിരുന്നു. തെരഞ്ഞെടുപ്പിൽ വോട്ട് രേഖപ്പെടുത്താനും സുഹൃത്തുക്കളോടൊപ്പം മദ്യപിക്കാനും പോയ ഇയാൾ, താൻ ഉടൻ വിവാഹിതനാകാൻ പോകുകയാണെന്ന് നാട്ടുകാരെ അറിയിക്കുകയും ചെയ്തിരുന്നു. സജിയുടെ ഈ അസാധാരണമായ മനോനില ഏവരെയും ഞെട്ടിച്ചിരിക്കുകയാണ്. ഇതിനിടെ, ഏകദേശം എട്ട് വർഷം മുൻപ് അപ്രത്യക്ഷനായ സജിയുടെ പിതാവിനെക്കുറിച്ചുള്ള അന്വേഷണവും പോലീസ് വീണ്ടും സജീവമാക്കിയിട്ടുണ്ട്. പിതാവിന്റെ തിരോധാനം സജിയുമായി ബന്ധപ്പെട്ടതാണോ എന്ന കാര്യത്തിൽ കൂടുതൽ വിവരങ്ങൾ ശേഖരിച്ചുവരികയാണെന്നും, നിലവിൽ ഇരട്ടക്കൊലപാതക കേസിൽ തെളിവുകൾ ബലപ്പെടുത്തുകയാണെന്നും ജില്ലാ പോലീസ് മേധാവി അറിയിച്ചു.
