തിരുവനന്തപുരം: ഈ വര്‍ഷം ശബരിമല തീര്‍ത്ഥാടനം വളരെ ശാന്തവും സമാധാനപരവുമായ അന്തരീക്ഷത്തില്‍ നടന്നുവരുന്നതിനിടെ ഭക്തജനങ്ങളെ വെല്ലുവിളിച്ചു കൊണ്ട് പല ആക്ടിവിസ്റ്റുകളും ആചാരലംഘനത്തിന് ശ്രമിക്കുന്നതിന് പിന്നില്‍ കൃത്യമായും ഒരു ഗൂഢാലോചനയുണ്ട്. ഇത് അന്വേഷിക്കണമെന്ന് ശബരിമല കര്‍മ്മസമിതി സംസ്ഥാന കണ്‍വീനര്‍ എസ്.ജെ. ആര്‍. കുമാര്‍ സര്‍ക്കാരിനോട് ആവശ്യപ്പെട്ടു.
ആചാരലംഘനത്തിന് എത്തുന്ന യുവതികളെ ഒരു കാരണവശാലും അതിന് അനുവദിക്കില്ല എന്ന് കേരള സര്‍ക്കാര്‍ ആവര്‍ത്തിച്ച് പറയുമ്പോഴും ഇന്ന് ശബരിമലക്ക് പോകാന്‍ തയ്യാറായി വന്ന ആക്ടിവിസ്റ്റുകളെ ഉടന്‍ തന്നെ മടക്കി അയയ്ക്കാന്‍ വേണ്ട നടപടി സ്വീകരിക്കണം. മടങ്ങിപ്പോകാന്‍ തയ്യാറാകുന്നില്ലെങ്കില്‍ ക്രമസമാധാന ലംഘനത്തിന് ഇടയാക്കുന്ന അവരെ അറസ്റ്റ് ചെയ്ത് വേണ്ട നിയമനടപടികള്‍ സ്വീകരിക്കണം.
ശബരിമല കര്‍മ്മസമിതി സര്‍ക്കാരിന്റെ അനുകൂലമായ നയത്തില്‍ വിശ്വാസമര്‍പ്പിച്ചു കൊണ്ട് ശബരിമലയിലും സംസ്ഥാനത്തും സമാധാനപരമായ അന്തരീക്ഷം സൃഷ്ടിക്കുന്നതിന് പൂര്‍ണ്ണമായി സഹകരിക്കുമെന്നും ഏത് സാഹചര്യത്തിലും പൂര്‍ണ്ണമായും സംയമനം പാലിച്ചുകൊണ്ട് സമാധാനപരമായ മാര്‍ഗ്ഗത്തില്‍ തന്നെ ആയിരിക്കും പ്രതികരിക്കുക എന്നും മുന്‍പ് തന്നെ വ്യക്തമാക്കിയിട്ടുണ്ട്.
ഇനിയും ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ വേണ്ട മുന്‍കരുതലുകള്‍ എടുക്കാന്‍ കേരള സര്‍ക്കാരും പോലീസും തയ്യാറാകണമെന്നും അദ്ദേഹം ആവശ്യപ്പെട്ടു.
